DISTRITU NO SUB-DISTRITU SIMU KAIXA INFORMASUN NO SUJESTAUN FOUN KONABA GOVERNASAUN LOKAL, DEZENVOLVIMENTU NO DESENTRALIZASAUN

Dili, 21 Marsu 2011 - Kaixa informasaun no sujestaun foun husi Ministeriu Administrasaun Estatal no Ordenamentu Territoriu (MAEOT) ohin loron entrega ona ba administrador distritu 13 no administrador sub-distritu 65, iha okaziaun enkontru konsultivu administrador sira ho MAEOT iha Dili. Inisiativa ida ne’e suporta husi konjuntu UNCDF-UNDP Programa Apoiu Governasaun Lokal (LGSP).

Kaixa refere, ne'ebe sei tau iha kada edifisiu distritu no sub-distritu sira iha fatin ne'ebe fasil atu haree no asesu, sei iha funsaun prinsipal atu enkoraja reasaun no partisipasaun iha nivel komunidade, hodi fornese sujestaun, proposta ka keixa konaba topiku hirak hanesan projetu no prosedimentu dezenvolvimentu lokal, governasaun lokal no atividade hirak ne’ebe iha relasaun ho prosesu desentralizasaun. Kaixa ida ne'e mos dezenha atu fasilita distribuisaun material informativu no edukasaun sivika ne'ebe produz husi MAEOT konaba governasaun lokal no desentralizasaun, iha formatu boletim, poster, folleta, publikasaun, pergunta & resposta no regulamentu foun sira.

Membru komunidade sira inklui, estudante, funsionariu publiku, membru sosiedade sivil sira ka reprezentante seitor privadu sira sei iha instrumentu úniku no diferente hodi fo sai sira nia preokupasaun ho dalan pratiku no direitamente. Administrador disritu 13 no edifisiu sub-distritu sira sei reponsabiliza atu fahe no simu informasaun ne’ebe iha kaixa ne'e nia laran, no atu avalia reasaun ne’ebe mai husi komunidade.

Sujestaun hotu-hotu ne'ebe simu sei analiza no diskuti iha nivel distritu, no kada trimestre sei submete relatoriu informativu ida ba Unidade Komunikasaun MAEOT no ba diresaun sira hotu, ho objetivu final atu produz fali rekomendasaun konaba oinsa atu hatene no responde ba rekezitu no nesesidade komunidade nian.

Rekomendasaun sira ne’e sei inklui kestaun ne'ebe iha relasaun ho planeiamentu projetu noi submisaun no prosedimentu ba PDL (Programa Dezenvolvimentu Lokal), PDD (Pakote Dezenvolvimentu Desentralizadu), no PDJ (Programa Dezenvolmentu Juventude), asesu ba informasaun, modalidade no linha distruibuisaun, transparensia no akuntabilidade husi regulamentu sira, no sujestaun konaba preparasaun ba estabelesimentu munisipiu iha futuru.

Atu hetan informasaun liu bele kontaktu :

Sebastião Pereira, Ofisial Media, MAEOT
Tel. (+670) 735-7544 - E-mail: sebastiao.pereira01@gmail.com