Notisias

MINISTRU ARCANGELO LEITE HALA'O INAGURASAUN BA PROJETU PDD1, PDD 2 NO PDL IHA DISTRITU BAUCAU

Baucau, 30 Novembru 2011
Ministru Arcangelo Leite hala'o inagurasaun simboliku ba projetu PDD 1, PDD 2 no PDL 2011 iha distritu Baucau ne'ebe hola fatin iha eskola pre-secundaria No. 3 Vila-Nova Baucau. Eskola refere hanesan projetu ida husi projetu 10 ne'ebe hetan inagurasaun. Husi projetu 10 ne'ebe inaguradu ne'e, projetu PDL 6 no Projetu PDD1, PDD 2 hamutuk 4.

Ministru Leite iha nia intervensaun hateten katak Implementasaun PDD, PDD 1, PDD 2 no PDL ne'e hanesan meius ida hodi prepara distritu sira hotu, la'os deit atu prepara autoridade lokal no lideransa komunitariu sira maibe prepara mos setor privadu sira atu oinsa bele kontribui ba dezenvolvimentu nasional. Ministru hateten tan katak bainhira problema mosu tenke buka meus atu rezolve hamutuk. Ministru mos aumenta tan katak bainhira hahu ona konstrusaun ba projetu maka mosu intervensaun husi parte ruma tenke liuhusi KDD, ne'e katak KDD mak iha kompetensia atu hola desizaun.

Problema edukasaun nu'udar problema nasional, ho inagurasaun eskola ida-ne'e hatudu katak governu la taka matan, governu rona duni saida mak durante ne'e sai preokupasaun komunidade ninian. Ba estudante sira ministru hato'o ninia lia menon; "kuidadu eskola ida-ne'e no ninia fasilidade tomak hanesan imi nian rasik, aproveita fatin ida ne'e atu estuda didi'ak. Tanba ita-boot sira mak futuru nasaun nian" dehan Ministru Leite.

Iha mos Problema ne'ebe imprezariu sira hasoru relasiona ho implemetasaun projetu balu ne'ebe seidauk to'o rohan ho razaun tanba materiais balun ba konstrusaun la faan iha Timor no tenke sosa husi indonezia, ida-ne'e fo impaktu ba prosesu implementasaun projetu tarde. Tanba ne'e Ministru husu ba kompania sira atu bele aselera uitoan prosesu konstrusaun ba obras hirak ne'e iha tempu badak nia laran.

Iha oportunidade ne'e Ministru mos hato'o Parabens ba imprezariu sira ne'ebe maka implementa ona projetu tuir kalendariu, tuir dezenu, tuir BOQ no mos garantia nia kualidade, no mos ba KDD Distritu Baucau.

Marka prezensa iha serimonia inagurasaun ida-ne'e mak Administrador distritu no sub-distritu, xefe suco no ofisial sira, imprezarius lokais, profesores no estudantes no mos komunidade sira.

Entretantu inagurasaun ba projetu PDD1, PDD2 no PDL tinan 2011 hala'o ona iha distriu 3 mak hanesan distritu Ermera, distritu Oe-cussi no distritu Baucau. Hein katak sei hala'o mos inagurasaun ba projetu sira iha distritu sanulu seluk iha tempu badak nia laran.

Atu hatene informasaun kle’an kona-ba komunikadu ne’e favor kontaktu

Sebastiao Pereira, Media Officer MAEOT Tel. (+670) 735-7544 - E-mail: sebastiao.pereira01@gmail.com