ERMERA, 9 Janeiru 2026 — S.E. Vise Ministru Administrasaun Estatal, Jacinto Rigoberto Gomes de Deus, hamutuk ho Sua Exelénsia Sekretáriu Estadu Protesaun Sivíl, Sr. Domingos Mariano Reis, Sexta-feira ohin partisipa iha selebrasaun Natál Konjunta Polísia Nasionál Timor-Leste (PNTL) Komandu Munisípiu Ermera.
Serimónia ne’e hala’o iha resintu Komandu PNTL Munisípiu Ermera ho tema “Tinan Foun mak Oportunidade Foun Atu Hadi’a A’an” ne’ebé mak hetan partisipasaun husi Prezidente Autoridade Munisípiu Ermera, Sr. José Martinho dos Santos Soares, Komandante PNTL Munisípiu Ermera, Sr. Ludgerio P. M. Lay, hamutuk ho Membru polísia no F-FDTL, Deputadu, Amu Pároku Glenu, Prezidente CMCLN Munisípiu Ermera, Prezidente CCI, Diretur Servisu Munisipais, Xefe Suku no Konvidadu sira.
Iha diskursu, Vise Ministru Administrasaun Estatál hato’o nia apresiasaun sinseru tanba bele selebra Natál hamutuk ho família boot PNTL Munisípiu Ermera, hodi destaka katak selebrasaun Natál konjunta ne’ebé inisia husi Ministru Interiór hala’o tiha ona ho susesu iha komandu PNTL munisípiu sira hotu iha semana kotuk.
“Ohin ita selebra espesial iha Ermera, tamba loron boot ami sira sivil goza ami nia direitu ne’e hamutuk ho ami nia familia sira, maibé husi PNTL ho F-FDTL loron boot imi servisu oras 24, hodi asegura festeza loron boot, maibé apresia tebes ba Komandu Jerál no Ofisial Polisia Suku (OPS), F-FDTL sira hotu no Autoridade Suku sira tamba buat hotu la’o ho di’ak”. Vise MAE elojia sira-nia dedikasaun no profisionalizmu hodi garante pás, seguransa, no orden públika partikularmente durante períodu Natál no Tinan Foun.
Vise Ministru subliña, Natál la’ós selebrasaun ka festeza de’it, maibé momentu atu halo reflesaun kle’an iha ita idak-idak nia a’an “Ha’u lori Ministériu Administrasaun Estatal nia naran hato’o Boas Festas Santo Natal no Dezeja Tinan foun 2026 ne’e nakonu ho domin, dame, progresu, unidade no Ermera oan tenke hamutuk”.
#Remata
Medi@Mae_2026
