Quinta-Feira, 01 Abril 2026—Diretor-geral Dezenvolvimentu Governu Lokal, António Augusto Guterres hala’o enkontru ho ekipa husi Sekretaria Estadu Komunikasaun Sosial-SEKOMS, hodi koalia kona-ba realizasaun programa “MEET THE PRESS” nebé sei hala’o iha Munisipiu Baucau, 10 Abril 2026.
“MEET THE PRESS” nudar programa ida husi Governu Konstitusionál Da-Sia iha setor komunikasaun social ne’ebé tau mós medida ida kona-ba Diseminasaun Politika Desentralizasaun Administrativa no Poder Lokal no sei hala’o uluk iha Munisipiu tolu.
Objetivu prinsipal husi programa ida ne’e, atu hato’o informasaun ne’ebé lolos ba povu kon-aba hametin komunikasaun públika no transparensia Governu nian iha prosesu desentralizasaun.
Asuntu espesífiku mak hato’o informasaun ne’ebé klaru no kredível relasiona ho programa governu nian kona-ba desentralizasaun ba komunidade iha nível munisipal, explika klean kona-ba mudansa kompetensia husi Governu Sentral ba governu munisipal no fó espasu ba media hodi halo konfirmasaun no pergunta direta ba fonte sira: Ministro Administrasaun Estatal no Presidente Autoridade.
Parlamentu Nasional aprova ona Lei No.23/2021, loron 10 Novembru, hodi estabelese enkuadramentu legal ba Desentralizasaun Administrativa no Poder Lokal ne’ebé iha artigu 72 husi Konstituisaun RDTL konsagra katak, administrasaun públika tenki kumpri prinsipiu desentralizasaun nian, ne’ebé fó poder ba entidade territorial tó sira nia orgaun reprezentativu rasik.
Programa ida neé sei envolve media Estatal, RTTL-EP, TATOLI-IP ne’ebé sei halo transmisaun direta, inklui Plataforma media online nebé hetan konvite husi SEKOMS. Programa ida neé sei foka uluk ba munisipiu tolu ne’ebé hatudu progresu signifikativu, tuir rezultadu monitorizasaun ne’ebé hala’o husi Ministeriu Administrasaun Estatal.
Aktividade neé sei hetan partisipasaun husi Autoridade Munisipal, reprezentante PNTL, Veteranu, Rádiu Komunidade no Sentru Informasaun Suku.
#Remata
#MediaDgdgl@MAE2026
