KLARIFIKASAUN BA PUBLIKU KONA-BA KOMEMORASAUN ANIVERSÁRIU RESTAURASAUN INDEPENDÉNSIA BA DALA-24
Dili, 22 Maiu 2026 Ministériu Administrasaun Estatal (MAE), hanesan responsável másimu ba iha komemorasaun loron Nasional iha aniversáriu Restaurasaun Independénsia ba dala 24, tuir despacho Sua Exelensia Primeiru Ministru nú.04/GPM/II/2026.
Iha eventu komemorasaun loron istóriku ida nee, Komisaun Organizadora hakarak agradese ba koordenasaun servisu ho Gabinete Orgaun Soberania, liña Ministérius relevantes hotu (Civil, militar), konfisaun relijiozu, Autoridade Munisipal, Autoridade Administrativa Atauro, RAEOA, Lideransas Komunitárias sira hotu nia kontribuisaun no apoia hodi bele hala’o komemorasaun ho diak, susesu tuir plano neebe mak planeia iha territóriu Timor Leste.
Relasiona ho notísia no krítika públika balun ne’ebé sirkula foin lalais ne’e iha média no rede sosiál kona-ba serimónia 20 Maiu 2026, nunee Komisaun Organizadora Nasionál ba Aniversáriu Restaurasaun Independénsia ba dala-24 hakarak hato’o klarifikasaun loloos ba públiku tomak hanesan tuir mai ne’e:
1. Serimónia iha Tasi-Tolu: Selebrasaun solenidade Icar no Arrear Bandeira Nasionál no Feira, konsertu músika iha Tasi-Tolu la’o ho susesu, paz, no trankilu. Selebrasaun hirak nee hetan partisipasaun másimu husi Konvidadu sira husi rai-laran no rai-liur no komunidade sira. Sua Eselénsia Prezidente Repúblika mós hato’o ona ninia apresiasaun ba servisu hotu ne’ebé komisaun halo;
2. Fatin ba Eis-Titulares Estadu: Tuir protokolu Estadu nian, Eis-Titulares Estadu hotu hetan tratamentu ne’ebé dignu. Sira hotu tuur hamutuk iha tribuna VVIP no VIP hanesan mós ho konvidadu altu-nível sira seluk. Kobertura husi média (lensa media) mós hatudu ho klaru katak Eis-Titulares sira tuur iha kadeira oin ho dignu no kontinua ho membru orgaun soberania sira iha filleira tur fatin seira seluk;
3. Imajen no Foto iha Portu Díli: Komisaun Organizadora hakarak klarifika katak, foto eróis da Pátria nian ne’ebé monta iha arredores Porto Dili (banner), la’ós monta husi Komisaun Organizadora ba komemorasaun loron Nasional tuir programa neebe mak hetan kuiñesimentu no Aprovasaun husi S.E Prezidente Repúblika antes asina konvite hodi distribui ba iha konvidade de Onra sira.(Tuir Informasaun la kredivel ne’ebe publika hosi Media Nasional SocialMedia Gmntv (https://youtu.be/3r4VfNEkqKk?si=cVYUmvNi79k-)
Dekorasaun Banner neebe monta iha fatin refere utiliza ba eventu lansamentu konstrusaun ba Sentru Konvensaun Internasional ne’ebé prepara no organiza husi Vice Primeiru Ministru I, Ministru Koordenador Asuntu Ekonomia no Ministru Turismo no Ambiente (MCAE) no serimonia lansamentu nee mos organiza iha loron hanesan Restaurasaun Independensia ba dala 24 (bele konfirma iha sekuénsia programa neebe publikadu mos iha Portal do Governo);
4. Valorizasaun ba Organização da Luta Rezisténçia: Komisaun Organizadora respeita no valoriza tebes kontribuisaun boot husi Frente Klandestina, Frente Diplomátika, Juventude Rezisténsia, no Kreda Katólika no mos Povu nia luta ba libertasaun nasionál. Estadu nunka haluha istória ne’e, tanba ne’e mak Estadu iha loron nasionál rasik, selebrasaun 12 de Novembru, hodi fó omenajen boot ba Juventude Loriku Aswa’in;
Komisaun Organizadora simu krítika konstrutivu hotu-hotu hodi hadi’a servisu ba futuru. Maske nune’e, komisaun husu ba sidadaun hotu-hotu atu halo krítika ho rasionál bazeia ba faktus ne’ebé loos.
Governu kontinua komprometidu nafatin atu lori dezenvolvimentu ba povu, no husu ba sidadaun hotu atu kontinua tau interese nasaun nian iha leten aas liu hodi mantein unidade no estabilidade.
Agradese wa’in ba partisipasaun povu tomak. “Hamutuk Ita Sei Konstrui Pátria ida ne’ebé Justu liu, Inkluzivu no Reziliente”
Dili, 22 Maiu 2026
Komisaun Organizadora Nasionál
#Hotu
#Medi@MAE_2026
