BAUCÁU, 01 Jullu 2026— Ministériu Administrasaun Estatál, MAE, liu husi Diretór-Jerál Desentralizasaun no Governu Lokál, DG-DGL, Sr. António Augusto Guterres, tun direta ba terrenu hodi hala’o monitorizasaun iha Postu Administrativu Laleia no Vemasse, Munisípiu Baukau.
Objetivu Prinsipál Vizita Traballu Ne’e mak atu Avalia jestaun arkivu no dokumentasaun iha postu, Monitoriza implementasaun Programa Nasionál Dezenvolvimentu Suku, PNDS; no Haree ba estrutura no dezempeñu servisu públiku iha postu administrativu rua ne’e.
Iha biban ne’e, Diretór-Jerál mós halo monitorizasaun fokalizadu ba PNDS. Nia husu relatóriu sira ne’ebé ligadu ho implementasaun programa iha postu rua, inklui relatóriu ezekusaun orsamentu, relatóriu progresu fíziku projetu nian, no relatóriu monitorizasaun.
Iha enkontru ho autoridade lokál sira, parte Ministériu no autoridade postu diskute kle’an kona-ba oinsá hodi hametin kbiit servisu no hadi’a tan atendimentu hodi responde ba nesesidade komunidade nian.
Vizita ne’e reflete kompromisu forte Governu nian, liu husi MAE, atu kontinua hadi’a prestasaun servisu públiku ne’ebé kualidade, efisiente no transparente. Ho nune’e bele fó servisu ho di’ak no responde lalais ba preokupasaun no nesesidade bázika komunidade sira iha Laleia no Vemasse.
#Hotu
#Medi@MAE_2026
