DÍLI, 27 de Julho de 2026– Segunda-feira semana ne’e, Governu liu husi S.E. Ministru Administrasaun Estatál (MAE), Tomás do Rosário Cabral, hala’o reuniaun ho Sua Eminénsia Dom. Virgílio do Carmo da Silva, SDB, iha Konferénsia Episkopál Timorense (CET), Lecidere, Díli.
Iha enkontru ne’e, Ministru Tomás atualiza rezultadu husi reuniaun Konsellu Ministru (KM) nian foin lalais ne’e, no foka liu ba preparasaun koletiva entre Governu no Igreja ba serimónia transladasaun restus mortais husi saudozu Bispu no Ámu-Lulik sira:
Dom Jaime Gracia Goulart, Dom José Joaquim Ribeiro, Monseñór Martinho da Costa Lopes, No Dom Alberto Ricardo da Silva, atu lori fila mai Timor-Leste.
Tuir planu ne’ebé estabelese ona, iha loron 1 de Setembru, Governu sei entrega ofisialmente restus mortais sira ne’e ba Igreja Katólika no sei kontinua kedas ho prosesu no ritu sira seluk atu fó onra ba saudozu sira-nia kontribuisaun no sakrifísu.
Prosesu transladasaun ne’e sei lori kedas restus mortais sira ne’e to’o iha Laleia, no sei la ba iha fatin seluk.
Ba serimónia no ritu sira hotu ba oin, Igreja Katólika mak sei kaer no organiza responsabilidade tomak, enkuantu Governu sei fó de’it apoiu no fasilitasaun, no Parte rua ne’e konkorda katak sei la iha atividade sira seluk, no kualkér atividade ne’ebé hala’o tenke tuir loloos ajenda ofisiál ne’ebé aprova ona entre Governu no Igreja.
Iha tempu hanesan Sua Emenencia Dom Virgilio do Carmo Cardial da Silva, SDB, Hato’o parabeniza no oferese mos prezente ba S.E. Ministru Administrasaun Estatal ne’ebé ohin loron selebra tinan moris nian ba dala-61.
#Hotu
#Medi@MAE_2026
