Viqueque, 30 Jullu 2026 – Iha Kinta-feira ne’e, Sua Exelénsia Ministru Administrasaun Estatál (MAE), Tomás do Rosário Cabral, akompaña husi Sua Exelénsia Ministru Justisa (MJ) Sérgio de Jesus Fernandes da Costa Hornai, Sua Exelénsia Ministra Saúde (MS Elia A. A. dos Reis Amaral, no Sua Exelénsia Vise-Ministru Administrasaun Estatál, , Jacinto Rigoberto Gomes de Deus, hamutuk ho Prezidente Autoridade Munisípiu Viqueque, Francisco C. S. de G. Soares,, ofisialmente inaugura Balkaun Úniku Munisípiu Viqueque, ne’ebé marka lansamentu Balkaun Úniku iha territóriu nasionál tomak.
Projetu ida-ne’e implementa husi Ministériu Administrasaun Estatál (MAE) liuhusi servisu hamutuk ho Programa Nasoins Unidas ba Dezenvolvimentu (UNDP) iha Timor-Leste, ho objetivu atu reforsa kooperasaun internasionál no hadi’a prestasaun servisu públiku, hodi hakbesik servisu governamentál ba komunidade.
Iha nia intervensaun, Sua Exelénsia Ministru Administrasaun Estatál, Tomás do Rosário Cabral, husu ba ekipa téknika sira husi MAE no Ministériu Justisa atu kontinua halo monitorizasaun no kontrolu ba funsionamentu Balkaun Úniku hafoin inaugurasaun. Pasu ne’e ho objetivu atu garante katak prestasaun servisu ba populasaun la’o ho efisiénsia, efikásia, no kualidade.
Balkaun Úniku mak sentru prestasaun servisu Governu Sentrál nian. MAE hala’o knaar nu’udar entidade jestora, enkuantu ministériu no instituisaun sira seluk presta sira-nia servisu iha fatin ida de’it. Inisiativa ida-ne’e reflete kompromisu Governu atu hakbesik servisu públiku ba povu no hadi’a asesu komunidade ba servisu esensiál sira,” dehan Sua Exelénsia Ministru Administrasaun Estatál, Tomás do Rosário Cabral.
Durante faze implementasaun téknika, Diresasaun-Jeral Simplifikasaun, Modernizasaun no Administrasaun Lokál (DGSMAL) servisu hamutuk ho Diresasaun-Jeral Servisu Rejistu no Notariadu hodi asegura disponibilidade servisu esensiál sira, hanesan Bilhete Identidade (BI), Pasaporte, no Sertidaun Rejistu Kriminál. Atu garante konektividade no operasaun ne’ebé di’ak ba Balkaun Úniku, DGSMAL mós halo koordenasaun ho Ministériu Transporte no Komunikasaun (MTK), liuhusi TIC Timor I.P. no Diresasaun Nasionál Infraestrutura Komunikasaun (DNIC).
Hafoin inaugurasaun, responsabilidade ba manutensaun edifísiu Balkaun Úniku sei transfere ba Autoridade Munisipál. Governu sei kompleta remodelasaun integrál ba edifísiu sira hotu, enkuantu Autoridade Munisipál sei kaer responsabilidade ba manutensaun no konservasaun instalasaun sira, hodi garante sustentabilidade no kontinuidade prestasaun servisu ba komunidade.
Serimónia inaugurasaun ne’e konta mós ho prezensa husi Sua Exelénsia Sekretáriu Estadu Dezenvolvimentu Lokál (SEDL) Mateus Wilfredos dos Santos Tallo, Sua Exelénsia Sekretáriu Estadu Asuntu Toponímia no Organizasaun Urbana (SEATOU) Germano Santa Brites Dias, Diretór-Jerál no Diretór Nasionál husi MAE no ministériu sira seluk. Iha mós reprezentante UNDP no União Europeia, Komandante PNTL Munisípiu Viqueque, reprezentante F-FDTL, CAC, Komisaun Funsaun Públika, administratór postu administrativu sira, xefe suku, veteranu, autoridade lokál, lia-na’in, no komunidade sira.
#Hotu
#Medi@MAE_2026