Dili, Segunda-feira 01 Setembru 2025—Sua Exelénsia Ministru Administrasaun Estatál, Tomás do Rosário Cabral, prezide serimónia ofisiál tomada de pose ba Prezidente Autoridade Munisipál Dili no Bobonaro nian ne’ebé foin hetan nomeasaun.
Serimónia solene ne’e hala’o iha resintu Ministériu Administrasaun Estatál Caicoli no lidera iha orasaun no juramentu ba emposadu na’in-rua husi Padre Mariano Quintão.
Bazeia ba despaixu husi Primeiru Ministru númeru 015/GPM/VIII/2025, nomeia Sr. Francisco dos Santos hodi ezerse kargu no kna’ar nu’udar Prezidente Autoridade Munisipál Dili nian. No despaixu númeru 016/GPM/VIII/2025, ezonera Sr. Alexandrino Pires husi kargu no kna’ar nu’udar Prezidente Autoridade Munisipál Bobonaro, no nomeia Sr. Paulo Moniz Maia hodi hala’o kna’ar nu’udar Prezidente Autoridade Munisípiu Bobonaro nian.
Prezidente Autoridade Munisipál sira nu’udar entidade jurídika tuir direitu públiku, dotada iha autonomia administrativa, autonomia finanseira ne’ebé luan, no ninia patrimóniu rasik, sujeita ba fiskalizasaun no tutela iha MAE nian, ezerse ninia funsaun sira tuir termu sira ne’ebé define ona iha dekretu-lei númeru 3/2016, loron 16 fulan-Marsu, ne’ebé republika husi dekretu-lei númeru 84/2023, loron 23 fulan Novembru ne’ebé aprova Estatutu Autoridade Munisipál sira no Grupu Tékniku Interministeriál ba Desentralizasaun Administrativa.
Prezidente Autoridade Munisipál nu’udar reprezentante Governu nian iha respetivu munisípiu no iha responsabilidade atu dirije orgaun no servisu sira Autoridade Munisipál nian, asegura koordenasaun servisu administrasaun lokál Estadu nian ne’ebé funsiona iha Munisípiu, no hatán ba sira-nia atividade sira perante tutela tuir artigu-20 hosi dekretu-lei númeru 20/2016, loron 16 fulan Marsu, iha ninia redasaun atuál.
Enkuantu, tuir artigu 21 husi dekretu-lei númeru 3/2016, loron 16 fulan-Marsu nian, iha nia redasaun atuál estabelese katak Prezidente Autoridade Munisipál livremente hetan nomeasaun no ezonerasaun husi Primeiru-Ministru tuir proposta husi Ministru Administrasaun Estatál.
Serimónia pose ne’e hetan partisipasaun husi Embaixadora Timor-Leste ba Japaun, Membru Governu, Xefe Gabinete sira, Prezidente Autoridade Munisipál, Autoridade Administrativa Ataúro, Diretur Jerál no Nasionál sira MAE nian, Asesór sira, Administradór Postu Administrativu sira, Xefe Departamentu sira, Sekretáriu Munisípiu sira, Diretur Servisu Munisipál sira, Membru Família sira husi nomeadu, no Funsionáriu sira Ministériu nian.
