Manatuto, 30 Marsu 2026 – Lansamentu Fatuk Dahuluk “Parke Industrial ETO” iha Manatuto
Sua Exelénsia Primeiru-Ministru, Kay Rala Xanana Gusmão hamutuk ho Diretur ezekutivu Esperansa Timor Oan (ETO) Sr. Nilton Gusmao dos Santos akompaña hosi Sua Exelénsia Ministru Administrasaun Estatal, Tomás do Rosário Cabral, S.E. Ministru Planeamentu no Investimentu Estratéjiku (MPIE), Gastão Francisco de Sousa, S.E. Ministru Justisa, Sérgio Hornai, S.E. Ministru Komérsiu no Indústria, Filipus Nino Pereira, S.E. Ministru Agrikultura, Pekuária, Peska no Floresta, Marcos da Cruz, S.E. Ministra Solidariedade Sosial no Inkluzaun, Verónica das Dores, Prezidenti CCI-TL, Emprezariu Senior, Sr. Oscar Lima, Prezidente Autoridade Munisipiu Manatuto, Sr. Luis Inacio Henrique Fernandes, segunda ohin, Ofisialmente lansa fatuk dahuluk ba Parke Industrial ETO iha Beadi, Aldeia Carlilo, Suku Aiteas, Postu Administrativu Manantuo Munisipiu Manatuto.
Parke Industrial ne’ebe konstrui husi kompania Esperansa Timor Oan (ETO), nu’udar parte estratejia atu promove dezenvolvimentu industria no kria oportunidade servisu ba komunidade lokal.
Parke Industrial ETO planeadu atu integra unidade ka industria hamutuk lima (5) mak hanesan:
– Fábrika Kaixa
– Fábrika Estrutura Metalika tipu H-Beam
– Fábrika Prosesamentu Sardina Enlatada
– Matadoru Modernu no Industria Prosesamentu Na’an
– Fábrika Prosesamentu Benifisiamentu fo’os
Núdar País Independente, Timor-Leste iha responsabilidade atu hametin ekonomia rai laran ho atividades industria, tan ne’e ETO mós hahu mai ho planu diversifikasaun atu kontribui hametin ekonomia Timor-Leste liu husi investimentu iha setor Industria manufatura, atu bele responde planu estratéjiku ne’ebé governu trasa ona ba Timor-Leste.
Esperança Timor Oan, Lda (ETO) núdar entidade ekonomia no parseiu estadu nian, ne’ebé eziste iha tinan 2000. ETO Kompremitidu atu kontinua investe no kolabora ho governu no autoridade lokal sira hodi diversifika investimentu iha rai laran liu-husi setor produtivu sira nebe bele kria kampu servisu ba povu timor oan no bele kontribui ba kreximentu ekonomiku nasionál.
Diretur Ezekutivu ETO iha nia diskursu “loron ohin, reprezenta konkretizasaun husi mehi boot husi ami grupo ETO nian, atu hari fatuk dahuluk núdar aliserse ba futuro foun, ba konstrusaun zona industrial iha rai manatuto.
“Hau agradese ba S.E. Ministru Administrasaun Estatal, ne’ebé ho nia vizaun estratéjiku no persistensia komunikasaun ho ami hodi hametin ami nia konfiansa, no fo dalan ba hau núdar Diretor Ezekutivu ETO, hodi toma desizaun atu investe iha munisipiu manatuto”.
Diretur Ezekutivu ETO ne’e hatutan “Durante faze konstrusaun ami estima kria entre atus ida to’o atus ida limanulu (100-150) postu servisu ho prioridade ba traballador timor oan sira.
Iha faze operasaun, parke ida ne’e bele kria atus neen to’o atus hitu (600-700) empregu diretu no liu rihun ida atus lima (1.500) ba empregu indiretu, inklui agrikultor, peskador, transportador, operador lojístiku, tékniku, juventude no negosiante lokal sira”.
Diretor Ezekutivu ETO “agradese mós ba PAM Manatuto no Komunidade Manatuto oan hotu, tamba imi nia apoiu, abertura no permisaun korejoja hodi foti desizaun importante tebes hodi aseita ho ami nia projetu investimentu ne’ebé sei mai atu kontribui dezenvolvimentu ekonomia rai manatuto sai realidade hodi hasoru politika desentralizasaun administrativa no poder lokal.
PAM Manatuto, iha nia Diskursu, “ami agradese ba Empreza ETO hodi lansa fatuk dahuluk Parke Industrial ida ne’e, liu-liu hodi hasae ekonomia povu nian no fo espasu firme ida atu reduz problema sosial sira iha aspetu dezempregu jovem sira nian”.
Iha seremónia lansamentu ida ne’e partisipa husi Membru Governu IX Konstituisional, Membru Parlamentu Nasionál, Prezidente Autoridade Munisipál, Xefe Gabinete MAE, Sr. Benigno H. da Cruz, Kamara Komérsiu Industria (CCI-TL), Banku Central Timor-Leste (BCTL), Banku Nasionál Komersiu Timor-Leste (BNCTL), Banku Mundial, Diretor Nasionál MAE, Diretor Servisu Munisipál, Emprezariu sira, Autoridade lokal, Xefe Suku no Komunidade Manatuto oan.
Medi@mae_2026
