Dili, 07 Abril 2026 – Diretór Jerál Institutu Nasionál Administrasaun Públika (INAP), Policarpo Amilcar Boavida, hamutuk ho Presidenti Komisaun Funsaun Públika, Agostinho Letêncio de Deus, ofisialmente hala’o abertura “Formasaun Lideransa Obrigatóriu ba Diretór Nasionál iha Salaun Auditóriu INAP, Comoro.
Formasun lideransa obrigatoria nudar meiu ida atu dezenvolve konhesimentu husi funsionáriu rekrutadu iha Administrasaun públika, kona-ba lala’ok servisu iha Administrasaun públika.
Tuir Lei Funsaun públika Nu. 8/2004 (alterasun Nu.5/2009), Dekretu Lei Nu. 25/2016 loron 20 fulan Junhu, koalia kona-ba Regime Kargu Diresaun no Xefia iha Administrasaun Públika, artigo 5, ponto 2 ne’ebé define katak, ezersisiu Kargu Diresaun husi funsionariu públiku presiza iha Kursu diresaun superior lideransa Administrasaun públika nian, konforme define husi instituisaun kompetente ba formasaun iha funsaun públika.
Relasiona ho Dekretu Lei refere, fó kompetensia ba INAP hodi hala’o Formasaun Lideransa Obrigatória liu husi Diresaun Nasional Formasaun Kualifikasaun no Profisiponal Administrasaun Públika (DNFQPAP) ne’ebé tuir regulamentu formasaun hanesan, Baze Legal Konstituisaun RDTL iha Artigu 137 (pontu 2).
Formasaun ida neé, formandos sira sei aprende materia sira konaba Lei Funsaun Públika Nu. 8/2004 ne’ebé ho alterasaun lei Nu. 5/2009) no koalia mós Dekretu-Lei Nu.38/2012, kona-ba formasaun no Dezenvolvimentu Funsaun Públika Artigu 9, ne’ebé define mós kompetensia INAP atu organiza no implementa formasaun Lideransa Obrigatória.
Iha intervensaun, Diretór Jerál INAP, Policarpo Amilcar Boavida, afirma katak formasaun lideransa ne’e esensiál atu hari funsaun públika ida ne’ebé forte, no responsabiliza atu investe iha kapasidade lideransa husi funsionáriu superiór sira, atu bele garante katak instituisaun públika sira bele serve di’ak liután povu Timor-Leste ho kualidade, transparénsia, no profisionalizmu.
Formasaun ne’ebé hala’o durante semana rua, hahú husi loron 07 to’o 24 fulan Abril formasaun ba tinan ne’e, partisipantes sira mai husi funsionáriu superiór na’in 30 husi ministériu no instituisaun estadu oi-oin.
#Remata
Medi@Mae_2026
