Sabadu, 16 de Maiu 2026,–Semana ne’e, membru Komisaun Organizadora Kontinua hala’o Preparasaun ba Komemorasaun Aniversariu Loron Restaurasaun Independénsia bad ala-24 iha Tasi-Tolu
Presidenti Komisaun Organizadora, S.E. Ministru Administrasaun Estatal, Tomás do Rosário Cabral, hamutuk ho membru K.O sira no mos akompania husi membru governu balun, hanesan S.E. Sekretario Estadu, SEATOU no S.E. Sekretariu Estadu SEAK observa servisu husi ekipa tekníku sira hala’o hela iha Tasi-Tolu, fatin ba realizasaun komemorasaun loron istoriku ne’e.
Aleinde halo observasaun ba servisu sira hotu ne’ebé membru komisaun sira prepara iha terenu, hanesan kondisaun ba fatin eventu, montajen palku, organizasaun logístika, limpeza ambientál no fasilidade sira seluk ne’ebé apoiu ba realizasaun komemorasaun nasionál ne’e, Presidenti Komisaun fó mos instrusoens ba ekipa servisu tekníku sira iha fatin realizasaun atu asegura preparativu sira hotu la’o tuir planu no susesu iha komemorasaun serimónia nasionál ne’ebé importante ba povu Timor-Leste no ohin loron iha terrenu hetan mos observasaun husi Sua Exelensia Primeiru Ministru, Kay Rala Xanana Gusmão, observa hela ekipa husi Komisaun Organizadora ne’ebé halo hela servisu iha Praça Tasi-Tolu.
Restaurasaun Independénsia ba loron 20 de Maiu tinan ne’e, mak momentu históriku ida importante tebes ba povu Timor-Leste, tanba ne’e preparasaun hotu presiza halo ho di’ak no responsabilidade atu serimónia ne’e bele la’o ho dignu no susesu.
Tuir ajenda ba komemorasaun loron istoriku ne’e, aban loron Domingu sei hahu ho abertura feira nasionál hodi komemora loron restaúrasaun 20 Maiu tinan ne’e, sei anima mos populasaun sira iha Dili no komunidade sira mai husi Munisípius ho atividade kriatividade sira hanesan, Feira Kulinária Lokál, no Konserto Musikal husi artista Timor-oan sira ne’ebé sei hahu husi oras tuku 6 lorokraik to’o remata.
Atividade Animasaun sira ne’e sei la’o durante loron tolu hahu husi dia 17 to’o dia 20 de Maiu ba populasaun sira hotu husi fatin ne’ebé deit sei konsentra iha Praça Tasi-Tolu. Nu-entantu programa ba animasaun konsertu muzikal no kulinaria sei ensera iha loron 20 Maiu depois Arear bandeira no kontinua konsertu parte kalan to’o remata iha fatin hanesan.
#Hotu
#Medo@MAE_2026
