Ministeriu Administrasaun Estatál liu husi Dirasaun Jeral Desentralizasaun Governu Lokál no Dirasaun Jeral Simplifikasaun Modernizasaun Administrasaun Lokál hala’o enkontru ida ho ekipa hosi Gabinete das Fronteiras Marítimas. Iha diskusaun parte rua foka liu kona-ba implementasaun polítika ekonomia azul iha Timor-Leste, nomos iha Autoridade Municipal sira.
Durante enkontru, diskute kona-ba desafiu no prioridade sira ne’ebé liga ho dezenvolvimentu estratéjia nasionál ida ba ekonomia azul, ho destaque ba importánsia koordinasaun institusionál no enquadramentu jurídiku no polítiku ne’ebé nesesáriu atu garante implementasaun efetiva.
Enkontru ne’e foka mos kona-ba Pontu importante ida ne’ebé konsidera hanesan prioridade mak nesesidade atu adere, harmoniza no implementa konvensaun internasionál relevante sira, ne’ebé konsidera hanesan instrumentu importante atu garante jestaun sustentável ba rekursu marítimu no atu harmoniza Timor-Leste ho kompromisu no prátika di’ak internasionál sira iha área marítima.
Diskute mós importánsia dezenvolvimentu no fortalese kuadru lejislativu nasionál, inklui elaborasaun lejislasaun espesífika atu bele operacionaliza prinsípiu ekonomia azul, reforça jestaun sustentável ba rekursu marítimu no klarifika kompeténsia institusionál iha setor ne’e.
Iha âmbitu governasaun teritorial no institusionál ba ekonomia azul, konsidera mós maneira di’ak liu atu integra Autoridade Administrativa Ataúro, Região Administrativa Especial Oe-Cusse Ambeno (RAEOA) no Autoridade Municipal sira ne’ebé iha área kosteira, ho objetivu atu identifika mekanizmu efikás ba articulasaun institusionál, koordinasaun no partisipasaun, hodi garante implementasaun harmonioza ba polítika públika sira iha setór marítimu.
Enkontru ne’e mós reforça entendimentu kona-ba nesesidade atu mantén servisu kontinuadu, articuladu no koordenadu entre entidade relevante sira, hodi asegura abordagem integradu no sustentável ba dezenvolvimentu ekonomia azul iha Timor-Leste.
Rekoñese importánsia estratéjika setor ida ne’e ba dezenvolvimentu sustentável nasaun nian, no mós nesesidade atu asegura kooperasaun inter-Institusionál forte hodi realiza objetivu sira ne’ebé determina ona.
Enkontru ne’e marka presensa husi parte MAE, DG DGL Sr. António Augusto Guterres, Sra. DG SMAL Maria Goretti, Sra. Secretária regional Assuntu Sociais no Organisaun Komunitária Merita Marques, Sr. Assessor jurídico Nuno Machado Reis, hamutuk ho ekipa representante husi Fronteira Maritima.
#Hotu
#Medi@MAE_2026
