Tbilisi, 23-25 Juñu 2026.
Sua Exelénsia Ministru Administrasaun Estatál, Tomás do Rosário Cabral,partisipa iha UN Public Service Forum 2026 ne’ebé realiza iha Sidade Tbilisi, Georgia, ho tema “Transformasaun Instituisaun Públika: Inovasaun, Akuntabilidade, Partisipasaun no Inkluzaun Avansada”.
Partisipasaun ne’e realiza tuir konvite husi Komisaun Organizadora, prezide husi Sua Exelénsia Ministru Justisa Georgia, Senhor Paata Salia. Forum ne’e rekoñese Timor-Leste nia prestasaun servisu públiku, liu-liu modelu ‘Balkaun Úniku’ no dizitalizasaun to’o nivel Suku nu’udar prátika di’ak hodi hakbesik servisu ba sidadaun.
Pontu Xave 4 Forum 2026 mak, Inovasaun, Responsabilidade, Partisipasaun, no Inkluzaun. Objetivu mak reforsa konfiansa públiku no garante servisu públiku ne’ebé justu hodi responde ba dezafiu kompleksu hanesan mudansa teknolojia, espetativa sidadaun nian ne’ebé aumenta, no desigualdade persistente.
Durante loron tolu, Forum kompostu husi semináriu, sesaun plenária, enkontru bilateral no meza redonda ministeriál ho partisipasaun husi Ministru, dirijente altu nivel, péritus, sosiedade sivíl, akademista, setór privadu, no parseiru dezenvolvimentu internasionál no rejionál.
Serimónia Abertura ne’e, ofisiál loke husi Sua Exelénsia Primeiru-Ministru Georgia, Senhor Irakli Kobakhidze, akompaña husi Sua Exelénsia Vise-Sekretáriu-Jerál ONU ba Asuntu Ekonómiku no Sosiál, Senhor Li Junhua, no Prezidente Komisaun Organizadora, Sua Exelénsia Ministru Justisa, Senhor Paata Salia.
Iha sesaun plenária dahuluk ho tema “Realiza Servisu Públiku Universál ne’ebé Justu no Promove Administrasaun Públika Inkluziva liuhusi Inkluzaun Dijitál” Timor-Leste fahe esperiénsia kona-ba Balkaun Úniku iha Munisípiu 12 inklui RAEOA no AA Atauro, no sistema dizitalizasaun ne’ebé instala ona to’o Suku 472.
Enkontru Bilaterál: Hafoin sesaun, S.E. Ministru Tomás Cabral hala’o reuniaun ho S.E. Ministru Justisa Georgia, Paata Salia, hodi diskute akordu kooperasaun iha área dizitalizasaun no atendimentu públiku. Ministru Salia hato’o agradesimentu ba Timor-Leste nia apoiu konsistente ba Georgia iha Nasoins Unidas. Nia mós fahe esperiénsia Georgia nian katak dizitalizasaun hasa’e transparénsia, haforsa instituisaun, no aumenta konfiansa públiku.
S.E. Ministru Tomás Cabral, lori Governu Timor-Leste nia naran, agradese konvite no subliña katak Timor-Leste hakarak aprende husi nasaun avansadu sira hodi hadi’a servisu. Nia konvida S.E. Ministru Justisa Georgia atu vizita Timor-Leste iha loron Restaurasaun Independénsia no observa diretamente funsionamentu Balkaun Úniku. Parte rua konkorda atu ekipa téknika kontinua komunikasaun hodi formaliza akordu kooperasaun iha futuru.
Durante loron 23-25 Junu 2026 iha Cidade Tbilisi, Georgia além partisipa Forum nee, Delegasaun neebe mak xefia husi Sua Exelensia Ministru Administrasaun Estatal (MAE), akompanhia husi Xefi Gabinete MAE, Diretora Geral Simplifikasaun Modernizasaun Administrasaun Lokal no Assessora jurídico MAE, hala’o mos reuniaun bilateral ho nia homologo sira husi nasaun Tailandia, Indonesia no Uzbekistan hodi bele koalia no fahe esperiensia ba malu relasiona ho pontus hat husi Forum nee, no bele mos estabelese akordu kooperasaun iha futuru oin mai.
#Hotu
#Medi@MAE_2026
