Manufahi, 14 de Julho 2026– Sua Exelénsia Vise-Ministru Administrasaun Estatál (MAE), Jacinto Rigoberto Gomes de Deus, hamutuk ho Diretór Jerál Interinu Instituto Nasionál Administrasaun Públika (INAP), Delfim Marques, ofisialmente loke Formasaun Integradu ba Autoridade Munisipál iha Munisípiu Manufahi.
Iha nia intervensaun, Vise-Ministru hateten katak durante tinan tolu mandatu IX Governu Konstitusionál, Governu konsege ona alkansa progresu signifikativu iha área governasaun no dezenvolvimentu iha nível munisipál. Nia enfatiza katak dezenvolvimentu rekursu umanu sai prioridade Governu nian, tanba formasaun hanesan instrumentu importante atu hasa’e koñesimentu, lideransa no kapasidade autoridade munisipál sira hodi prepara implementasaun Poder Lokál.
Vise-Ministru mós husu ba autoridade munisipál sira atu hametin planeamentu, aprovizionamentu no ezekusaun projetu sira ho kualidade, transparénsia no responsabilidade, hodi garante rezultadu ne’ebé fó benefísiu ba komunidade no kontribui ba dezenvolvimentu sustentável iha munisípiu sira.
Iha oportunidade ne’e, Diretór Jerál Interinu INAP, Delfim Marques, esplika katak, objetivu husi Formasaun Integradu ba Autoridade Munisipál mak atu hasa’e kapasidade, esperiénsia no kompeténsia autoridade munisipál sira iha área lideransa, governasaun lokál, planeamentu no jestaun dezenvolvimentu. Ida-ne’e atu mellora kualidade prestasaun servisu públiku, promove boa governasaun, transparénsia no akuntabilidade, no responde ho efetivu ba nesesidade komunidade.
Formasaun Integradu ne’e realiza durante loron 4, hahú husi tersa-feira, 14 de Jullu, to’o sesta-feira, 17 de Jullu 2026, ho partisipasaun husi autoridade munisipál sira husi Munisípiu Aileu, Ainaro, Covalima no Manufahi
#Hotu
#Medi@MAE_2026
