Objetivu husi vizita ne’e mak hodi akompaña Diretór Administrasaun Estatál ne’ebé sei asumi kargu iha Rejime Substitusionál ba Kompeténsia Prezidente Autoridade Munisípiu (PAM) Aileu nian.
Prosesu ida-ne’e bazeia ba orientasaun lolo’os atu asegura katak servisu administrasaun no jestaun governasaun lokál nian iha Aileu bele la’o ho di’ak, liuliu iha kestaun ezekusaun kompeténsia nian ne’ebé hala’o duni iha rejime substitusaun nia laran.
Iha vizita ne’e, Diretór-Jerál Desentralizasaun no Governu Lokál (DG-DGL), Sr. António Augusto Guterres, aprezenta ofisiálmente Sr. Acilino Manuel Branco ba Autoridade Munisípiu Aileu, nudar pesoál ne’ebé sei ezekuta funsaun tuir Rejime Substituisaun PAM Aileu.
Prezensa Sr. Acilino Manuel Branco nia objetivu mak atu asegura kontinuidade servisu administrativu no koordena preparasaun hotu-hotu ho di’ak, hodi bele realiza serimónia Tomada de Pose ba Prezidente Autoridade Munisípiu Aileu nomeadu, Exmo. Sr. Jacinto Ribeiro Dias, ne’ebé planeia ona atu hala’o iha semana oin.
Iha parte seluk, Autoridade Munisípiu Aileu reafirma sira-nia prontidaun atu kontinua servisu hamutuk ho Ministériu Administrasaun Estatál no entidade relevante sira. Ida-ne’e ho objetivu atu garante prosesu tranzisaun lideransa la’o ho di’ak no ordenadu, hodi kontinua fó servisu públiku ne’ebé kualidade ba komunidade iha Munisípiu Aileu.
Hafoin sorumutu ne’e remata, ekipa husi Ministériu Administrasaun Estatál akompaña Autoridade Munisipál Aileu hodi observa direita fatin ba serimónia tomada de pose PAM Nomeadu nian, ne’ebé lokaliza iha resintu Jardím Sabraka-laran, Aileu.
Vizita ne’e akompaña mós husi Diretóres Nasionais MAE nian no ekipa lojístika sira. Prezensa ekipa lojístika nasionál nian mak atu hateke besik fatin instalasaun ekipamentu sira hanesan “Sound System”, nune’e bele anima hikas povu Aileu atu kontinua hametin unidade no fraternidade hodi konsentra ba prosesu dezenvolvimentu iha Aileu.
#Hotu
#Medi@MAE_2026
