DILI, 23 Jullu 2026
Primeiru-Ministru (PM), Kay Rala Xanana Gusmão nomeia Jacinto Ribeiro Dias nu’udár Prezidente Autoridade Munisipál Aileu, tuir Despaixu Nú._/PM/VII/2026.
Iha despaixu hanesan, PM mós ezonera João Bosco dos Santos hosi kargu Prezidente Autoridade Munisipál Aileu ho efeitu imediatu.
Iha despaixu ne’e hatuur Autoridade Munisipál Aileu nu’udár entidade públika ida ho personalidade jurídika, autonomia administrativa, autonomia finanseira no patrimóniu rasik.
Entidade ne’e sujeitu bá superintendénsia no tutela Ministru Administrasaun Estatál, tuir Estatutu Autoridade Munisipál sira no Grupu Tékniku Interministeriál bá Desentralizasaun Administrativa, ne’ebé aprova hosi Dekretu-Lei Nú. 3/2016, loron 16 Marsu, ho alterasaun hosi Dekretu-Lei Nú.34/2025, loron 15 Outubru.
Dokumentu ne’e mós hateten katak, Prezidenti Autoridade Munisipál mak reprezentante Governu iha munisípiu ida-idak, ho responsabilidade atu dirije órgaun no servisu Autoridade Munisipál, asegura koordenasaun servisu administrasaun lokál Estadu nian no responde bá nia atividade sira bá Ministru Administrasaun Estatál, tuir artigu 20 hosi Dekretu-Lei Nú. 3/2016.
Tuir artigu 21 hosi dekretu-lei refere, Prezidente Autoridade Munisipál nomeia no ezonera livremente hosi Primeiru-Ministru, tuir proposta Ministru Administrasaun Estatál.
Proposta nomeasaun ne’e mai hosi Ministru Administrasaun Estatál liuhosi karta ho referénsia Nú.183/M-MAE/VII/2026, loron 22 Jullu 2026, ne’ebé propoin Jacinto Ribeiro Dias atu okupa kargu Prezidente Autoridade Munisipál Aileu.
Governu konsidera katak nia perfíl pessoál no profisionál adekuadu atu dezempeña funsaun ne’e no atu atinje objetivu governamentál sira bá autoridade munisipál.
Ho desizaun ida-ne’e, João Bosco dos Santos ezonera hosi kargu ho efeitu imediatu, no Jacinto Ribeiro Dias sei hahú dezempeña funsaun hanesan Prezidente Autoridade Munisipál Aileu hosi data tomada de posse, tuir dispozisaun legál sira.
Despaixu ne’e mós instrui Ministru Administrasaun Estatál, ho possibilidade delegasaun, atu organiza lalais serimónia tomada de posse Prezidente Autoridade Munisipál foun, tuir artigu 23 hosi Dekretu-Lei Nú.3/2016.
Primeiru-Ministru mós hato’o koñesimentu bá Komisaun Funsaun Públika atu kumpre formalidade legál no regulamentár sira, no haruka publika despaixu ne’e iha Série II Jornál Repúblika.
#Hotu
#Medi@MAE_2026
