DILI, 23 JULHO 2026.
Sua Excelénsia Ministru Administrasaun Estatál, Tomás do Rosário Cabral, partisipa iha abertura Formasaun Téknika Integrada ba Enjeñeiru Munisipál, Rejiaun Administrativa Espesiál Oecusse Ambeno (RAEOA) no Ataúro, ne’ebé realiza durante loron rua, 23 to’o 24 Jullu 2026, iha Salaun Delta Nova.
Formasaun ne’e ho tema “Kapasitasaun Jestaun Siklu Projetu Eskala Kiik Bazeia bá Padraun no Prosedimentu Tékniku ADN, I.P.”, ho objetivu atu hasa’e kapasidade tékniku munisipál sira iha área planeamentu, implementasaun, monitorizasaun no kontrolu kualidade projetu infraestruturas, hodi prepara rekursu umanu ba implementasaun polítika desentralizasaun podér lokál.
Iha serimónia abertura ne’e, Primeiru-Ministru, Kay Rala Xanana Gusmão, apela ba enjeñeiru munisipál sira atu aproveita formasaun ida-ne’e hodi hametin kapasidade profisionál no prepara-an ba governasaun lokál ne’ebé forte, eficiente no responsivu ba nesesidade povu.
Ministru Planeamentu no Investimentu Estratéjiku, Gastão Francisco de Sousa, hateten katak formasaun ne’e importante atu reforsa kapasidade rekursu umanu iha setor infraestruturas no garante katak projetu dezenvolvimentu implementa tuir padraun tékniku ne’ebé di’ak.
Iha oportunidade ne’e, Diretór Ezekutivu ADN, Januário Maia Guterres, esplika katak treinamentu ne’e destina ba tékniku Programa Dezenvolvimentu Integradu Munisipál (PDIM) no Programa Nasional Dezenvolvimentu Suku (PNDS), hodi hasa’e koñesimentu no kapasidade téknika atu asegura implementasaun projetu infraestruturas ho kualidade, responsabilidade no benefísiu sustentável ba komunidade.
Treinamentu ne’e involve partisipante na’in-56, kompostu hosi tékniku PDIM na’in-28 no tékniku PNDS na’in-28, ho oradór na’in neen hosi asesór no tékniku sénior ADN. Iha remata atividade ne’e, ADN sei entrega sertifikadu ba partisipante sira ne’ebé kompleta treinamentu hanesan rekoinesimentu ba sira-nia komitmentu hodi kontinua dezenvolve kapasidade profisionál.
Partisipa mós iha atividade ne’e Primeiru-Ministru, Ministru Planeamentu no Investimentu Estratéjiku, Sekretáriu Estadu Dezenvolvimentu Lokál, Prezidente Autoridade Munisipál sira, Autoridade RAEOA no Ataúro, no enjeñeiru munisipál sira hosi teritoriu tomak Timor-Leste.
#Hotu
#Medi@MAE_2026
