DILI, 02 Jullu 2026 – Diretór-Jerál Desentralizasaun no Governu Lokál (DGDGL), Sr. António Augusto Guterres, reprezenta Ministériu Administrasaun Estatál (MAE) sai nu’udar oradór prinsipál iha Kongresu Asosiasaun Feto Munisípiu Dili (AFEMDIL), kinta-feira neʼe. Eventu ne’e hala’o iha Salaun B AMD, Dili.
Iha biban ne’e, DG-DGL, Sr. António Augusto Guterres, aprezenta materiál kona-ba “Disseminasaun Lei Poder Lokál no Desentralizasaun Administrativa, Lei Númeru 23/2021, 10 Novembru”. Nia esplika katak polítika desentralizasaun labele la’o mesak, maibé tenke fó mós fatin ba feto sira hodi foti desizaun iha nivel lokál.
DG-DGL afirma mós katak, partisipasaun feto sira nian hodi hetan oportunidade iha desentralizasaun poder lokál Importante tebes.
Ho nune’e, feto sira bele sente katak sira mós iha responsabilidade iha prosesu dezenvolvimentu no rekonstrusaun nasionál, no mós kumpre sidadaun sira-nia espetativa hodi hetan oportunidade iha prosesu demokrátiku.
Formasaun ne’e hetan partisipasaun másimu husi Xefe Aldeia sira no funsionáriu sira husi Autoridade Munisípiu Dili.
