Viqueque, Sábadu, 21 Juñu 2025 — Sua Exelénsia Ministru Administrasaun Estatál, Tomás do Rosário, hamutuk ho Reverendísimu Bispu Dioseze Baucau, Don Leandro Maria Alves, ofisiálmente re-inaugura no fó bensaun ba Kapela Nossa Senhora Maria Auxialiadora, iha Suku Builo, Postu Administrativu Ossu, Munisípiu Viqueque
Orsamentu ne’ebé prevee ba projetu reabilitasaun kapela ne’e husi fundu tranferénsia públiku liuhosi Programa Nasionál ba Dezenvolvimentu Suku (PNDS) tinan fiskál 2024 ho total $ 48.773.00. Orsamentu ne’ebé iha, la’ós utiliza de’it ba reabilitasaun, maibé utiliza mós ba konstrusaun rezidénsia ba Padre sira.
Serimónia inagurasaun marka ho signifikadu espirituál ne’ebé kle’an no partisipasaun komunidade nian. Selebra misa espesiál ida iha ne’ebé sarani na’in-141 simu Sakramentu Krisma, enkuantu kazál na’in tolu simu sakramentu matrimóniu nian. Eventu ne’e la’ós de’it hafoun estrutura fízika kapela nian maibé mós enrikese sarani sira-nia moris espiritualmente. Hafoin ne’e, Ministru ho Bispu, vizita fatin konstrusaun ne’ebé la’o hela ba kapela seluk ne’ebé finansia hosi PNDS iha Suku Wabubu.
Durante eventu ne’e, Ministru MAE mós asina plaka ba projetu PNDS ne’ebé konstrui Rezidénsia ba Pesoál Saúde sira, nomós projetu Programa Investimentu Dezenvolvimentu Munisipál (PDIM) ba tinan fiskál 2024 ne’ebé konstrui edifisiu eskritóriu foun ida ba Sekretáriu Estadu Formasaun Profisionál no Empregu (SEFOPE).
Serimónia ne’e hetan partisipasaun maka’as husi parte interesada prinsipál oioin, inklui Prezidente Autoridade munisípiu Viqueque, Komandante PNTL Viqueque, reprezenante husi Xefe Estadu Maior F-FDTL, Veteranu sira, Diretór Jerál no Diretór Nasionál sira husi Ministériu Administrasaun Estatál, Xefe Departamentu, Sekretáriu Exekutivu PNDS, Sekretáriu Munisípiu, Diretór Servisu Munisípiu, Xefe Suku no Aldeia, nomós komunidade. Sira-nia prezensa reflete kolaborasaun maka’as entre governu sentrál, lideransa munisípiu, no komunidade lokál sira hodi avansa dezenvolvimentu lokál no hadi’a sidadaun sira-nia kualidade moris.
