Governu liuhusi Ministériu Administrasaun Estatál, organiza serimónia ofisiál komemorasaun Aniversáriu Konsulta Populár ba dala-26, loron istóriku ne’ebé simboliza povu Timor nia sakrifisiu no aten-barani no unidade iha luta ba ukun rasik-an, URA. Selebrasaun ne’e hala’o iha Jardim Largo Lecidere, hahú iha tuku 2:00 lokraik to’o kalan.
Komemorasaun ne’e hahú ho Marsa Saudável, ne’ebé halibur partisipante sira, reprezentante komunidade sira, estudante sira, no bainaka sira, hotu-hotu la’o hamutuk hodi fó onra ba memória 30 Agostu 1999 nian.
Konvidadu no partisipante sira husi postu sira iha Munisípiu Dili nian mak hanesan Postu Administrativu Cristo Rei no Postu Administrativu Nain-Feto, konsentra iha tasi-ibun Bidau Santana (iha Sede Suku Bidau Santana nia oin), akompaña husi banda marsa Eskola Sekundária Cristal nian, sira ho orgullu marsa ba diresaun Estátua Nossa Senhora Imaculada Conceição, Lecidere.
Iha tempu hanesan, partisipante sira husi Postu Administrativu Vera Cruz no Dom Aleixo, halibur hamutuk iha Jardim Motael, akompaña husi banda marsa Eskola Sekundária Canossa, hodi marsa hamutuk to’o iha Estátua Nossa Senhora Imaculada Conceição, Lecidere.
Iha tuku 3:30 lokraik, hala’o orasaun iha Estátua Nossa Senhora Imaculada Conceição Lecidere, ne’ebé prezide husi Sua Eminénsia Kardeal. Hafoin reza, partisipante sira kontinua no halibur iha fatin serimónia prinsipál iha Jardim Largo Lecidere.
Aniversáriu Konsulta Populár ba dala 26 nu’udar momentu reflesaun no orgullu nasionál ne’ebé kle’an, hodi fó onra ba povu Timoroan nia determinasaun ne’ebé iha 30 Agostu 1999 vota ho korajen no konviksaun ba independénsia no soberania.
