Ministériu Administrasaun Estatál (MAE) organiza programa ksolok no memorável iha Jardim Largo Lecidere, hodi komemora Aniversáriu Konsulta Populár ba dala-26. Eventu ne’e kombina reflesaun kona-ba jornada istóriku Timor-Leste nian ba independénsia ho atividade animadu, prémiu, teatru, kuiz, no múzika, halo selebrasaun ne’e sai signifikativu ba jerasaun foin sa’e sira.
Destake ida husi eventu ne’e maka atribui prémiu ba manan-na’in sira entre partisipante sira liu husi door prize. Manan-na’in sira ne’ebé sorte hetan prémiu sira hanesan motor, zeleira, bisikleta, telemovel, ventiladór, kettle elétriku (buli chook), rice cooker no sasán estudante nian.
Atu fó hanoin ba públiku kona-ba importánsia loron 30 fulan Agostu tinan 1999 nian, Ministériu Edukasaun (ME) halo aprezentasaun teatru ida. Obra teatru ne’e ilustra korajen povu Timoroan nian iha tempu Konsulta Populár, bainhira sidadaun sira riska buat hotu hodi vota ba ukun rasik-an. Aprezentasaun ne’e sai hanesan lisaun istória moris ida, hodi ajuda estudante no foin-sa’e sira atu komprende sakrifísiu sira ne’ebé halo liberdade ohin loron nian sai posível.
Iha programa ne’e mós iha sesaun kuiz interativu, ne’ebé envolve estudante na’in lima ne’ebé reprezenta eskola sekundária lima iha Dili laran. Aleinde ne’e, pergunta lima maka dirije ba públiku enjerál, hodi fó oportunidade ba ema hotu atu partisipa. Sira ne’ebé hatán ho loloos hetan prémiu atrativu hanesan telemovel, kanéla, laptop, no prezente seluk tan. Atividade ida ne’e la’ós de’it lori divertimentu no emosaun, maibé mós enkoraja aprendizajen no envolvimentu liuliu entre foin-sa’e sira.
Iha âmbitu komemorasaun ne’e inklui animasaun múzika husi Banda Ministériu Administrasaun Estatál (MAE), Grupu Lahane, no banda lokál sira seluk.
