Iha reuniaun ne’e, S.E. Ministro MAE fó orientasaun ba Autoridade RAEOA atu oinsa prepara proposta orsamentu atu aprezenta iha Komisaun Revizaun Orsamentu ba Retifikativu.
Iha Proposta orsamentu ne’e, Excia Ministro husu atensaun husi Autoridade RAEOA ba salariu e vensimentu, Bens e Servisu, Kapital Dezenvolvimentu, Kapital Menor no Transferensia Públika no funsionamentu Fundo Espesial Dezenvolvimentu-FED.
Alein de ne’e, S.E. Ministro MAE mós orienta Presidente RAEOA no estrutura foun atu tau atensaun ba area edukasaun, saúde, Obras Públikas no buka identifika projetu sira ne’ebé finansia husi PNDS, no kontrola implementasaun programa merenda eskolar.
Governante ne’e orienta mós autoridade RAEOA tau atensaun ba Planu Asaun Anual no area agrikultura tamba tuir orientasaun husi S.E. Primeiro-Ministro KayRala Xanana Gusmão ba munisipiu sira hotu tenki prepara ba segunda époka.
Entretantu, Presidente RAEOA Régio da Cruz Salu iha nia intervensaun kontinua husu asistensia teknika husi MAE atu nune’e servisu hotu iha area ne’ebá bele la’o diak tuir regra no dalan legal.
PA. RAEOA mós hato’o preokupasaun kona-ba konektividade hanesan transporte aereo hodi fasilita movimentu komunidade sira. Partisipa mós iha enkontru ne’e, Diretor Ezekutivu ADN, Diretor Nacionál Planeamentu e Finansas Munisipál MAE no Sekretary Ezekutivu PNDS, no dirigentes husi RAEOA.
#Remata
#Medi@MAE
