Sexta Feira ,05 Juñu 2026
S.E. Ministru MAE, Tomás do Rosário Cabral ho Ekipa kontinua hala’o reuniaun ho Arcebispo Metropolitano Dili, Dom Cardeal Virgilio Do Carmo, Iha Edefisiu MAE, Caicoli, Dili hodi kontinua diskute kona-ba preparasaun transladasaun restos mortais prelados katólikos ne’ebé hala’o sira nia kna’ar pastoral iha Timor‐ Leste.
Reuniaun ba dala tolu, loron Sexta Semana ne’e ko’alia kona-ba preparasaun hodi bele realiza ho diak iha prosesu tomak Trasladasaun restos mortais misionarios nain tolu husi Portugal mai Timor–Leste, Informa Dom. Virgílio Cardeal do Carmo da Silva,SDB. hafoin remata reuniaun ekipa.
Dom. Virgílio hatutan liu tan katak, preparasaun kuaje to’o ona porsentu 50%. Nu-entantu Igreja ho familia prepara ona resto mortais Bispo Dili Dom. Ricardo da Silva iha Fatin Malo’a, no ekipa konjunta Governu-Igreja mos kordena ona ho ajensia ne’ebé responsabel ba preparasaun prosesu transladsaun Bispo Timor-oan husi Portugal mai Timor-Leste.
Ajensia ne’ebé organiza resto mortais Bispo Timor-oan mai TL. ne’e husi Portugal, ne’ebé servisu kordenasaun ho Governu Portugal, informa S.E. Ministru MAE, Tomás do Rosário Cabral ba jornalista sira hafoin remata reuniaun ekipa.
Iha mos kestoens husi jornalista sira kestiona kona-ba asuntu sira relasiona ho kondekorasaun ba Bispo Dom. Martinho nia kontribuisaun ba luta,
S.E. Ministru responde katak, ne’e kompetensia Estadu tomak nian hodi hare asuntu ne’e.
Tuir orariu tentativa dia 1 Setembru tinan ne’e resto mortais Bispo Dom. Martinho Lopes sei to’o iha Dili, no dia 10 Setembru Komisaun sei konvida sarani sira hola parte iha misa iha Tasi-Tolu Dili.
Hafoin remata misa, sei lori urna sira mai halo’ot iha igreja Katedral Dili.
Komisaun responsavel husi Governu sei responsabliza ba kna’ar Operasional sira mak hanesan logistiku, administrativus, finansas, no aprovisionamentu, tuir despacho S.E. Primeiro Ministro Kay Rala Xanana Gusmão Nu. 005/III/2026.
Reuniaun ba loron sexta feira nian kontinua diskusaun asuntu sira husi reuniaun dahuluk nian no atualiaza procesu preparasaun servisu tekníku sira tuir sequensia ne’ebé Governu prepara ba programa Transladasaun Restos Mortais husi Portugal mai Timor–Leste.
Reuniaun ne’e partisipa husi S.E. Ministru MAE, S.E. Ministru MPIE, no Bispo Dili, Dom. Virgílio Cardeal do Carmo da Silva, Padres, Chefi Gabinete MAE, Benigno H. G.da Cruz, no ekipa tekníku.
#Hotu
#Medi@MAE_2026
