RAEOA, 14 de Jullu 2026 — Ministériu Administrasaun Estatál (MAE), liuhusi Diretór-Jerál Desentralizasaun no Governu Lokál (DG-DGL), Sr. António Augusto Guterres, sai oradór dahuluk no ofisialmente loke atividade Sensibilizasaun no Formasaun Prosesu Elaborasaun Planu Investimentu Rejionál no Rejime Jurídiku Aprovizionamentu PDIM.
Atividade ne’e hala’o iha Salaun Alfândega, Rejiaun Administrativa Espesiál Oe-Cusse Ambeno (RAEOA), no sei la’o durante loron tolu, hahú husi loron 14 to’o 16 de Jullu 2026.
Iha abertura, Autoridade Rejionál PA-RAEOA informa katak formasaun ne’e sai baze fundamentál ida hodi hametin kapasidade tékniku sira nian iha rejiaun. PA-RAEOA husu ba partisipante hotu, liuliu funsionáriu Sekretaria Rejionál ba Asuntu Komunitáriu no Jestaun (SRACJ) hamutuk ho Administradór Postu Administrativu (APA) sira iha RAEOA, atu rona ho atensaun no implementa duni koñesimentu ne’e iha prátika, nune’e dezenvolvimentu iha Oe-Cusse bele la’o ho loloos, transparente, no tuir baze legál ne’ebé vigór.
Iha fatin hanesan, DG-DGL, Sr. António Augusto Guterres, hamutuk ho Diretór Nasionál Apoiu Implemetasaun Planeamentu no Dezenvolvimentu Integradu (DNAIPDI), Sr. José Ramos Marçal, esplika katak Planeamentu Dezenvolvimentu Integradu (PDI) importante tebes hodi harmoniza planu nasionál ho planu rejionál no suku.
Prosedimentu ne’e iha objetivu atu asegura katak programa no projetu sira responde duni ba nesesidade povu nian, no kontribui ba dezenvolvimentu ekonómiku, sosiál, no ambientál ne’ebé sustentável.Formasaun ne’e mós kobre oinsá siklu PDI tenke bazeia ba identifikasaun problema, konsultasaun públika, definisaun vizaun, to’o monitorizasaun no avalaisaun kontínua.
Aleinde ne’e, Diretór Nasionál DNAIPDI, Sr. José Ramos Marçal, ho Diretór-Jerál aprezenta mós matéria kona-ba Rejime Jurídiku Aprovizionamentu iha administrasaun públika, ne’ebé tenke tuir prinsípiu legalidade, transparénsia, responsabilidade, igualdade ba konkorénsia, no efisiénsia, hodi garante uza osan públiku ho lolos ba benefísiu povu nian.
#Hotu
#Medi@MAE_2026
