Manufahi, 17 de Julho 2026– Sekretária Munisipál Planeamentu, Investimentu no Dezenvolvimentu Integradu (PIDI), Sra. Filomena da Costa Nunes, ne’ebé reprezenta Prezidente Autoridade Munisipál Manufahi, hamutuk ho Diretór Nasionál Apoiu Administrasaun Suku (DNAAS), Sr. Celestino Marques, ne’ebé reprezenta Diretór-Jerál Desentralizasaun no Governu Lokál (DG-DGL), ohin ensera Formasaun Integradu ba Autoridade Munisipál sira husi parte sentrál ne’ebé kompostu husi Autoridade Munisípiu Aileu, Ainaro, Covalima inklui Munisípiu Manufahi.
Formasaun ne’e hala’o ona durante loron haat (4), hahú husi loron 14 fulan Julho no remata ohin loron 17 de Julho 2026, ne’ebé hetan partisipasaun másimu husi Sekretáriu/a Munisipál PIDI no Diretór/a Servisu Munisipál sira, iha salaun enkontru Autoridade Munisipál Manufahi.
Objetivu husi formasaun ida ne’e atu hasa’e koñesimentu, abilidade no kompeténsia lideransa sira nian nune’e bele iha kualidade servisu ba iha idak-idak nia área ne’ebé sira jere. Formasaun ne’e mós sai parte ida husi preparasaun hodi prienxe kondisaun mínimu atu hakat ba Desentralizasaun Administrativa no Poder Lokál.
Durante atividade ne’e, formadór sira husi Ministériu Administrasaun Estatál kompostu husi Asesora PARTISIPA-DG-DGL, Diresaun Nasionál Governasaun Lokál (DNGL), Diresaun Nasionál Apoiu Instalasaun Munisipál (DNAIM), Diresaun Nasionál Apoiu Implementasaun Planeamentu Dezenvolvimentu Integradu (DNAIPDI) no Diresaun Nasionál Apoiu Administrasaun Suku (DNAAS) hamutuk ho ekipa tékniku sira.
Hafoin remata sesaun aprezentasaun, kontinua ho diskusaun grupu hodi identifika lakuna sira, nune’e bele buka solusaun hamutuk hodi projeta melloramentu servisu administrasaun públika iha futuru.
#Hotu
#Medi@MAE_2026
