VIQUEQUE, 30 JULLU 2026 – Sua Exelénsia Ministru Administrasaun Estatál (MAE), Tomás do Rosário Cabral, akompaña husi Sua Exelénsia Ministru Justisa (MJ), Sérgio de Jesus Fernandes da Costa Hornai, no Sua Exelénsia Ministra Saúde (MS),Elia A. A. dos Reis Amaral, hamutuk ho Prezidente Autoridade Munisípiu Viqueque, Francisco C. S. de G. Soares, ofisialmente inaugura projetu reabilitasaun Merkadu Olobai, iha Munisípiu Viqueque.
Antes inaugurasaun ofisiál, Merkadu Olobai hetan bensaun husi Amu Pároku Viqueque, Pe. Toto. Projetu reabilitasaun ne’e konstruí no ezekuta husi Kompañia CANIELA UNIPESSOAL, LDA. Projetu ne’e ho objetivu atu hadi’a infraestrutura merkadu, aumenta konfortu ba fa’an-na’in no sosa-na’in sira, no hamoris kresimentu ekonómiku lokál.
Iha nia intervensaun, Prezidente Autoridade Munisípiu Viqueque hateten katak inaugurasaun Merkadu Olobai ne’e nu’udar realizasaun ba kompromisu IX Governu Konstitusionál nian, atu lori dezenvolvimentu besik liu ba povu no hadi’a asesu komunidade ba infraestrutura públika ne’ebé suporta atividade ekonómika.
Prezidente Autoridade Munisípiu mós apela ba komunidade tomak atu uza, no jere, no tau matan ba fasilidade merkadu ne’e ho responsabilidade, atu nune’e bele sai fatin ba promosaun atividade komérsiu, kria oportunidade buka-moris, hasa’e rendimentu família, no fó kontribuisaun ba dezenvolvimentu ekonómiku iha Munisípiu Viqueque.
Serimónia inaugurasaun ne’e partisipa husi Diretór-Jerál Dezenvolvimentu Governu Lokál, Komandante Polísia Munisípiu Viqueque, reprezentante Veteranu sira, Sekretáriu Munisipál, Autoridade Postu Administrativu Viqueque, Xefe Suku sira, lideransa lokál, no komunidade Munisípiu Viqueque ne’ebé marka prezensa hodi fó apoiu ba inaugurasaun infraestrutura públika ne’e.
Projetu reabilitasaun Merkadu Olobai refleta esforsu Governu, liuhusi Ministériu Administrasaun Estatál no parseiru relevante sira, atu hametin dezenvolvimentu lokál, hadi’a servisu públiku, no hasa’e bem-estar komunidade nian iha Munisípiu Viqueque.
#Hotu
#Medi@MAE_2026
