ERMERA, 9 Janeiru 2026 — Vise Ministru Administrasaun Estatal, S.E. Jacinto Rigoberto Gomes de Deus, partisipa no asiste iha Jogu Finál Torneiu Futeból Rotativu Pe. Mário do Carmo Lemos Belo, ne’ebé hala’o iha Estádiu Café Gleno Munisípiu Ermera. Eventu ne’e atrai partisipasaun maka’as husi komunidade, grupu foin-sa’e sira, jogador sira, no ema ne’ebé gosta desportu, ne’ebé reflete nivel interese públiku ne’ebé a’as ba dezenvolvimentu desportu iha munisípiu.
Iha diskursu, Vise-Ministru subliña katak atividade desportiva sira hanesan ne’e importante tebes hodi halibur ema, promove dame no respeitu ba malu, hametin solidariedade iha komunidade, no dezenvolve talentu sira husi foin sa’e sira nian. Torneiu ne’e organiza ba dala tolu ona, inisiativa husi Asosiasaun Juventude Ermera ho apoiu husi IX Governu Konstitusionál liu husi Ministériu Juventude, Desportu, Arte no Kultura (MJDK).
“Avo Nana rasik nu’udar Primeiru Ministru mos la taka matan ho ninia apoiu moral tomak hodi eventu ida ne’e la’o ho di’ak. Eventu ne’e sai hanesan referérnsia pozitivu ba munisípiu hotu-hotu atu bele kria atividade desportiva sira hanesan ne’e para munisípiu sir abele iha kreatividade”. Vise MAE afirma.
Iha biban ne’e, Vise Ministru hato’o agradesimentu no apresiasaun ba Komisaun Organizadora, ne’ebé lidera husi Padre Angelo Salsinha, Ermera nia oan ida ne’ebé oras ne’e hala’o kna’ar nu’udar Padre Pároku iha Igreja Balíde Dili, hodi mobiliza foin-sa’e sira no koordena parte interesada sira hodi organiza ho susesu torneiu ida ne’e.
Eventu ne’e konklui ho entrega piala, medalla, no prémiu ba ekipa vensedór sira, hodi marka enserramentu ida ne’ebé ksolok no memorável husi torneiu ne’e.
#Remata
Medi@Mae_2026
