OE-CUSSE, Segunda-Feira, 11 de Maiu 2026 — Ministériu Administrasaun Estatál (MAE) hala’o vizita traballu ba Rejiaun Administrativa Espesiál Oe-Kusse Ambeno (RAEOA) ne’ebé hahú husi loron 11 to’o 14 de Maiu 2026. Objetivu husi atividade ne’e mak hodi fó asisténsia téknika ba Konsellu Konsultivu Regionál (KKR) kona-ba planeamentu no orsamentu ba tinan 2026.
Sesaun abertura ba enkontru ne’e loke ofisialmente husi Prezidente Autoridade RAEOA, Sr. Régio da Cruz Salu, hamutuk ho Diretór Jerál Desentralizasaun no Governu Lokál (DGDGL), Sr. António Augusto Guterres. Alende membru KKR, enkontru ne’e mós hetan partisipasaun másimu husi funsionáriu públiku sira husi liña ministeriál oioin iha RAEOA, ne’ebé tuir hodi rona matéria planeamentu nian.
Tuir ajenda ne’ebé planeia ona, matéria sira fahe tuir kompeténsia hanesan tuir mai ne’e: Diretór Jerál DGDGL, Sr. António Augusto Guterres, lidera sesaun hodi aprezenta kestaun téknika kona-ba Estabelesimentu Konsellu Konsultivu Regionál, ne’ebé foka ba enkuadramentu legál no funsionamentu órgaun nian.
Diretór Nasionál DNPFM aprezenta kona-ba Planu Asaun Anuál (PAA) no Narativu ba Proposta Orsamentu Jerál Estadu (OJE), hodi fó vizaun klaru kona-ba planeamentu finanseiru ba rejiaun.
Diretór Ezekutivu PNDS hato’o progresu no dezafiu sira relasiona ho Implementasaun Programa Nasionál Dezenvolvimentu Suku (PNDS) iha Oe-Kusse.
Reprezentante husi Ministériu Finansas (MdF) mós hola parte hodi ko’alia kona-ba Konsulta Sidadania, nu’udar dalan hodi involve hanoin husi komunidade sira iha planeamentu estadu nian.
Hafoin sesaun aprezentasaun matéria, Diretór Jerál DGDGL, Sr. António Augusto Guterres, entrega ekipamentu komunikasaun (telefone fixo wireless) ba Prezidente Autoridade RAEOA, Sr. Régio da Cruz Salu. Iha biban ne’e, Diretór sira hamutuk ho Diretór UIT mós entrega mós ekipamentu hanesan ba Sekretária Rejionál (Secam) no ba Gabinete Prezidente nian hodi fasilita ligasaun komunikasaun servisu ne’ebé lalais, moos, no efisiente entre governu sentrál ho administrasaun Rejionál.
Prezidente Autoridade RAEOA, Sr. Régio da Cruz Salu, agradese ba asisténsia téknika no ekipamentu ne’ebé MAE entrega. Nia afirma katak planeamentu tenke tuir regra no bazeia ba povu nia nesesidade.
“Ita presiza koordenasaun ne’ebé metin hodi garante katak projetu sira-ne’e lori duni mudansa ba moris-di’ak populasaun Oe-Kusse nian,” dehan nia.
Reuniaun ne’e konklui ho kompromisu hodi hametin liután kooperasaun entre MAE no Autoridade RAEOA, hodi garante funsionáriu sira bele ezekuta programa ho di’ak ba moris-di’ak populasaun Oe-Cusse Ambeno nian.
#Hotu
#Medi@Mae_2026
