Dili, Segunda Feira, 01 juñu 2026—Prezidente Autoridade Munisipiu Dili, Sr. Francsco dos Santos, hamutuk ho Diretor-Geral Dezentralizasaun no Governu Lokal (DGDGL), Sr. António Augusto Guteres, ne’ebé reprezenta Ministru Administrasaun Estatál, SE. Tómas do Rosário Cabral, no Komisáriu funsaun Públika, Sr. José Talo Soares Cristóvão, Fó tomada dé pose ba estrutura foun Autoridade Munisipiu Dili nian mak hanesan, Secretário Municipal na’in ida (1), Diretores hamutuk na’in ualu (Sefe Departamentu na’in ualu ( totál emposadu hamutuk na’in sanulu resin hitu (17).
Iha serimónia ne’e, emposadu sira ne’ebé nomeadu ba kargu foun halo juramentu atu hala’o sira-nia responsabilidade ho profesionalizmu, integridade no dedikasaun ba servisu públiku. Serimónia tomda dé pose ne’e hala’o iha salaun AMD. ne’ebé hetan bensaun husi Reverendisimu Pe. Bernardo Paiva.
Objetivu prinsipál husi mudansa estrutura ne’e maka atu hadi’a di’ak liu tan efisiénsia servisu, hametin koordenasaun no atinji prioridade servisu AMD nian. Relasiona ho tomada dé pose ba kargu foun, PAM Dili husu ba responsavel sira ne’ebé simu konfiansa atu la haree ba kargu hanesan priviléjiu pesoál, maibé nu’udar responsabilidade públiku ne’ebé tenke hala’o ho laran-metin no integridade.
Podér ne’ebé simu tau iha bolsu, labele tau iha fuan no tenke uza ho responsabilidade atu atinji rezultadu ne’ebé benefísiu instituisaun no povu.”
Nia mós enfatiza katak kargu ne’ebé simu la’ós priviléjiu ka rekoñesimentu ba méritu pesoál de’it, maibé responsabilidade atu fó solusaun ba problema sira ne’ebé eziste iha Munisípiu Dili.
Iha fatin hanesan, Diretor-Geral Dezentralizasaun no Governu Lokal (DGDGL) Sr. António Augusto Guteres ne’ebé reprezenta S.E Ministru Administrasaun Estatal, Tomás do Rosário Cabral, apela ba emposadu sira atu servisu ho dedikasaun, kontinua aprende no servisu hamutuk hodi hatudu katak Munisípiu Dili bele sai ezemplu ba munisípiu sira seluk.
Konfiansa ne’ebé Estadu fó ba ita bo’ot sira tenke akompaña ho auto konfiansa, komitmentu no rezultadu servisu ne’ebé di’ak. Konfiansa ne’e sei depende ba avaliasaun dezempeñu no kontribuisaun ne’ebé ita bo’ot sira fó ba instituisaun no povu, aleinde ne’e mós Susesu mandatu PAM Dili no programa governativu sira depende ba kontribuisaun no kolaborasaun hosi imi hotu,” dehan DGDGL.
#Hotu
#Medi@MAE_2026
