Loron 28 de Novembro de 1975 maka loron importante tebes ba Nasaun no Povo Timor-Leste, tamba iha loron ne’e maka Povo no Nasaun Timor-Leste nebe reprezenta husi Partido Fretilin deklara unilateralmente Independencia Estado Timor-Leste ho naran Repubilca Democratica de Timor-Leste – RDTL.
Independencia Unilateral 28 de Novembro de 1975 maka inspira, motiva no habrani Povo tomak no ninia liman kroat Forcas Armadas da Libertação de Timor-Leste – FALINTIL, hodi luta hasoru forca okupasaun estranjeira durante tinan 24 nia laran, no ikus mai, sai Povo, Nasaun no Estado Indepente total no final iha 20 de Maio de 2002.
Nune’e, VI Governu Konstitusional, liu husi Ministerio Administracao Estatal promove Feira atu komemora Loron 28 de Novembro de 1975, hodi konvida povo tomak ninia partisipasaun ho objektivu atu festeiza loron historiku ne’e, nebe sai loron povo tomak nian. Nudar loron povo tomak nian, Ministerio Administracao Estatal fo oportunidade no fatin ba povo oan sira harame Feira ho iniciativas no criatividades oin-oin, hanesan jogos oin-oin nebe bele rekreasaun no fo ksolok ba povo oan sira.
