Aileu – 19 Juñu 2026.
Sesta feira semana ne’e, Ministériu Administrasaun Estatál (MAE) liu husi Diretór Jerál Desentralizasaun no Governu Lokál (DG-DGL), Sr. António Augusto Guterres, reprezenta Sua Eselénsia Ministru Administrasaun Estatál, hamutuk ho Prezidente Autoridade Munisipál (PAM) Aileu no Komisaun Funsaun Públika (KFP), fó tomada de posse ba kargu xefia nain tolu,(3) iha salaun Edifísiu Autoridade Munisipál Aileu.
Ofisiál nain tolu ne’ebé simu responsabilidade foun mak, Abrão N. da Costa, nudar Xefi Departamentu de Rede, Be’e no Saneamentu Báziku, Egidio Francisco Gomes Aleixo, nudar Xefi Departamentu Monitorizasaun no Avaliasaun, Marcos Bonaparte, nudar Xefi Departamentu de Rejistu no Notariadu.
Iha intervensaun husi DG-DGL, subliña katak tomada de posse ba kargu de xefia mak prosesu ofisiál ne’ebé ema ida simu no hahú hala’o knaar iha pozisaun lideransa ka xefia ida iha instituisaun públika ka privado.
DG-DGL hatutan mos katak, objetivu hosi tomada de posse ne’e mak atu formaliza nomeasaun ba kargu, fó autoridade legál atu hala’o kna’ar, no hatudu kompromisu bo’ot atu servi ho responsabilidade, integridade, no profisionalismu.
Tomada de posse ba kargo de chefia mak momentu importante ida ne’ebé marka hahú responsabilidade foun atu lidera ekipa, hadi’a servisu no garante implementasaun programa sira ho efetividade no transparénsia, hodi nune’e hatudu kooperasaun metin hodi dudu kualidade administrasaun lokál.
Iha biban ne’e DG-DGL representa MAE hato’o parabéns ba kargu foun sira atu servisu ho responsabilidade bo’ot nune’e bele inspira ekipa tomak hodi atinji objetivu organizasaun nian, liu-liu hodi hadi’a kualidade serbisu públiku ba komunidade Aileu, afirma DG-DGL, Sr. António Augusto Guterres.
Serimónia ne’e konta mós ho presensa Reverendíssimo, Padre Parokia Aileu, no Secam nain rua, no Apa Aileu Villa, Diretores servisu Munisipál Aileu, hamutuk ho Funsionario sira.
#Hotu
#Medi@MAE_2026
