DILI, Tersa-Feira, 13 Janeiru 2026—Sua Exelénsia Ministru Administrasaun Estatál, Tomás do Rosário Cabral, simu vizita kortezia hosi Embaixadora Timor-Leste nian iha Nova Zelándia, Dra. Idelta Maria Rodrigues, hamutuk ho empregadór sira ne’ebé daudaun ne’e fó hela oportunidade empregu ba traballadór Timor-oan sira iha Nova Zelándia.
Empregadór sira hasoru malu ho Ministériu Administrasaun Estatál (MAE) hodi introdús sira-nia interese maka’as hodi estabelese kooperasaun ho Autoridade Munisipál sira no Autoridade Administrativa Ataúro liu husi atividade negósiu ne’ebé oras ne’e dadaun hala’o ona iha Nova Zelándia no mós hakarak investe iha Timor-Leste, partikularmente iha nível munisípiu no iha Ataúro.
Empreza sira hatudu interese maka’as atu investe iha setór xave oioin, inklui agrikultura, indústria, pekuária no servisu veterinária sira, liuliu iha hakiak animál no prosesamentu na’an fresku hodi bele fan iha rai laran no mós oinsá bele hahú fan ba rai liur tuir kualidade no kuantidade ne’ebé bele produz. Aleinde ne’e, sira destaka planu atu investe iha dezenvolvimentu kapasidade rekursu umanu, foka ba formasaun abilidade laborál ne’ebé aliña ho nesesidade merkadu no padraun internasionál.
Sua Exelénsia Ministru hato’o benvindu ba delegasaun no reafirma Governu nia prontidaun atu servisu hamutuk ho empregadór no investidór sira liuhusi Autoridade Munisipál sira no Autoridade Administrativa Ataúro. No subliña katak kooperasaun hanesan ne’e sei kontribui maka’as ba dezenvolvimentu ekonómiku lokál, kriasaun empregu, no kreximentu sustentável iha munisípiu sira.
Durante enkontru, Ministériu mós fahe informasaun kona-ba investidór potensiál sira seluk ne’ebé hahú ona envolve ho autoridade munisípiu sira hodi inisia investimentu sira no atividade ekonómiku.
Enkontru ne’e hala’o iha Gabinete Ministru, no hetan partisipasaun husi Xefe Gabinete, Sr. Benigno H da Cruz, no Asesór Internasionál ba Asuntu Jurídiku, Sr. Nuno Reis.
#Remata
Medi@Mae_2026
