Viqueque, Quinta-Feira, 12 Marsu 2026 S.E. Vise-Ministru Administrasaun Estatál, Jacinto Rigoberto Gomes de Deus, hala’o enkontru koordenasaun ho estrutura Autoridade Munisípiu Viqueque, lidera husi Prezidente Autoridade Munisípiu (PAM), Sr. Francisco C.S. de G. Soares, hodi halo preparasaun ba vizita ofisiál husi S.E. Primeiru-Ministru, Kay Rala Xanana Gusmão, ba Munisípiu Viqueque.
Durante enkontru ne’e, Vise-Ministru subliña importánsia husi preparasaun ne’ebé di’ak no organizadu, no hateten katak vizita husi Primeiru-Ministru ne’e mos sei sai hanesan oportunidade atu halo avaliasaun kona-ba kondisaun mínimu iha munisípiu sira iha tinan ida ne’e. Avaliasaun ne’e atu haree munisípiu ida ne’ebé mak prontu ona atu simu poder lokál, tuir planu Governu ne’ebé sei implementa iha tinan oin.
Iha oportunidade ne’e, Vise-Ministru mos enkoraja Autoridade Munisípiu Viqueque atu aproveita vizita husi Xefe Governu ho di’ak, liu husi preparasaun ida ne’ebé organizadu no efetivu. Tanba liu husi vizita ida ne’e mak sei ajuda Governu avalia kapasidade munisípiu ida-idak, liu-liu iha aspetu preparasaun hodi hala’o implementasaun poder lokál.
Enkontru ne’e mos marka prezensa husi Diretur Nasionál sira husi Ministériu Administrasaun Estatál, Diretur Servisu Munisipál sira, Komandante PNTL Munisípiu Viqueque, no funsionáriu sira seluk.
Hafoin remata enkontru, Vise-Ministru hamutuk ho ekipa nasionál, akompaña husi PAM ho nia estrutura, halo mos observasaun ba projetu Planeamentu Dezenvolvimentu Integradu Munisípiu (PDIM), inklui reabilitasaun Merkadu Olobai iha Munisípiu Viqueque. Iha tempu hanesan, delegasaun mos halo observasaun ba rezidénsia PAM ne’ebé prepara atu sai fatin ba S.E. Primeiru-Ministru atu deskansa no toba iha kalan ida durante nia vizita ofisiál iha Munisípiu Viqueque.
Iha momentu ne’e, delegasaun mos halo vizita no observasaun ba Kolam Ikan iha Suco Loi-Huno, Postu Administrativu Ossú, Munisípiu Viqueque. Projetu ida ne’e implementa husi Ministériu Agricultura, Pekuária, Peskas no Florestas, ho objetivu atu suporta dezenvolvimentu setor peskas no promove produsaun ikan iha área lokal. Fatin ne’e mos planeadu atu tama iha agenda vizita S.E. Primeiru-Ministru durante nia vizita ofisiál ba Munisípiu Viqueque.
#Remata
Medi@Mae_2026
