LAUTEM, Segunda-Feira 16 Marsu 2026—S.E. Ministru Administrasaun Estatál (MAE), Tomás do Rosário Cabral hamutuk ho Sua Exelénsia Primeiru Ministru (PM), Kay Rala Xanana Gusmão hala’o inaugurasaun bá edifísiu Balkaun Úniku (BU) iha Postu Administrativu Lospalos munisípiu Lautem
Prezensa Balkaun Úniku ne’e atu hakbesik prestasaun servisu bá sidadaun sira, moderniza no simplifika servisu atendimentu bá públiku ho lalais no fásil, no bele promove transparénsia hodi governasaun di’ak besik-liu bá povu.
Balkaun Úniku ne’e estabelese bá dala-sanulu resin ida iha territóriu, liu-liu iha Lautem neʼebé mai ho ekipamentu foun no lori servisu governamentál sira atu trata Billete Identidade (BI), Pasaporte, no Sertidaun Kriminál hodi hamenus tempu, kustu no todan bá viazen sidadaun sira ne’ebé hela do’ok hosi kapitál.
S.E. Ministru Administrasaun Estatál (MAE), Tomás do Rosário Cabral informa katak Balkaun úniku ne’e estabelese uluk iha munisípiu Manatuto, Baucau, Ataúro, Aileu, Manufahi, Covalima no Oecusse, Bobonaro, no ohin iha Munisipiu Lautem.
Viqueque Ermera Ainaro sei inaugura iha tempu besik. Balkaun Úniku maka sistema ida integradu, servisu hamutuk ho liña ministeriál sira liu-liu Ministériu Justisa.
Prosesu pasaporte halo iha Balkaun Úniku ne’e, maibé imprime iha Dili tanba Pasaporte hanesan dokumentu ida ofisiál tebtebes, nia sentrál iha Serve ne’ebé iha Ministériu Justisa. Maibé dokumentu seluk prodús iha Balkaun Úniku.
Servisu ne’e hetan apoiu mós hosi Ministériu Transporte no Komunikasaun (MTK) tanba prosesu sira ne’e tomak presiza internet. Alende ne’e servisu hamutuk mós ho Programa Nasaun Unidas bá Dezenvolvimentu (PNUD) desde tinan 2023. Ba Balkaun Úniku Munisípiu Lautem utiliza orsamentu Governu nian. “Balkaun Úniku ida ne’e bele fasilita no Governasaun besik liu tan ba povu. Ida ne’e sai sentru ida Govenu sentrál nian, informasaun tomak iha ne’e” S.E. Ministru MAE Tomás do Rosário Cabral hateten.
Prezidente Autoridade Munisípiu Lautem, Melio de Jesus agradese bá Governu Da-Sia ne’ebé bele estabelese ona edifísiu ne’e hodi bele fasilita sidadaun sira bele mai trata ona dokumentus iha-ne’e.
Balkaun Úniku Munisípiu Lautem, hetan previlejiu husi Governu entrega mos Transportes hanesan kareta ida no motorizada ida ba kordenador servisu Balkaun Úniku Munisípiu Lautem husi S.E. Primeiru Ministru Kayrala Xanana Gusmão, no mos entrega dokumentu importante sira hanesan Billete Identidade oferese husi S.E. Primeiru Ministru Kay Rala Xanana Gusmão ba sidadaun mane ida no Sertidaun Kriminál ba sidadaun feto ida ne’ebé produs no emprimi iha BÚ Lautem hanesan sekuensia ikus nian hodi remata programa inagurasaun ofisiál ba edefisiu Balkaun Úniku.
Ho inaugurasaun Balkaun Úniku Munisípiu Lautem nian, Governu komesa kompleta dadauk ona estabelese Balkaun Úniku iha munisípiu sira mak hanesan; Manatuto,Manufahi, Baucau, Covalima, Dili, Ataúro, Likisa, Bobonaro, Oe-Cusse, Aileu, Manatuto, Manufahi no Lautem.
#Remata
Medi@Mae_2026
