Lautém, 10 Abril 2026-Ministériu Administrasaun Estatal liu-husi Diresaun Jerál MAE kompostu husi Diretór Jerál Desentralizasaun no Governu Lokal, Sr. António Augusto Guterres, DG-STAE, Sr. Elviro Fernandes Moniz, DG-TOU, Sra. Maria Odete Barros Florindo no DG-DL Sr. Virgílio da Costa, sexta ohin, hala’o vizita ba iha tasi ibun valu hodi hare’e no foti dadus ba rai ne’ebé mak iha futuro mai sei konstrui Bungalow unidade lima Iha suku Tutuala, Aldeia Valu Sere, ne’ebé sai hanesan fatin turismu komunitaria.
Iha vizita ne’e akompaña hosi Sekretáriu Munisipál Planeamentu, Investimentu no Dezenvolvimentu Integradu (PIDI) Laútem, sr. Tibursio dos Santos, hamutuk ho Diretór Servisu Munisipál Obras Públikas Munisípiu Laútem, Xefe Suku Tutuala, Sr. Estanislau dos Santos inklui tékniku sira.
Xefe Suku Tutuala, Estanislau dos Santos informa “ohin hanesan faze dahuluk ba Levantamentu dadus, hodi hare fatin atu implementa Bungalow hamutuk unidade lima Iha área Valu Sere ho medida rai 7.200 metru kuadradu, área ne’ebé mak potensial tebes ba área turístiku, tan ne’e implementa Bungalow ida ne’e importante tebes atu hasae rendimentu ba komunidade Iha Valu-Sere.
Xefe Suku ne’e hatutan “Wainhira projetu ne’e remata, Bungalow ida ne’e sei entrega ba suku no suku mak sei jere, atu nune’e nia rendimentu direita ba Komunidade sira.
Ho Bungalow foun ida ne’e, turista sira sei fasil liu atu explora ilha Jaco no Tasi Valu nia furak, suku no aldeia sira, tasi-ibun, foho sira, no fatin patrimóniu kulturál sira, ida-ne’e hein atu hamosu rendimentu barak liután ba komunidade lokál sira.
#Remata
Medi@Mae_2026
