17 Juñu 2026
Kuarta-feira, semana ne’e, Konsellu Administrasaun Fundu Infraestrutura (CAFI) hala’o reuniaun estratéjika ida hodi avalia progresu implementasaun projetu sira ne’ebé hetan finansiamentu husi Fundu Infraestrutura (FI), no diskute prioridade sira ba dezenvolvimentu infraestrutura nasionál iha futuru.
Iha reuniaun ne’e, membru CAFI hamutuk ho ekipa téknika halo avaliasaun kle’an kona-ba progresu projetu sira ne’ebé hodi tempu agora la’o hela iha terrenu. Diskusaun sira foka ba implementasaun projetu, aspetu ambientál, no dezafiu sira ne’ebé hasoru durante ezekusaun obra, hodi buka solusaun atu garante projetu sira bele la’o tuir planu ne’ebé estabelese ona. Aleinde ne’e, membru CAFI mós diskute kona-ba proposta projetu foun no planeamentu ba investimentu estratéjiku sira iha setór prioritáriu hanesan estrada, sistema bee-mós, no saneamentu, ne’ebé konsidera importante atu responde ba nesesidade komunidade no promove kresimentu ekonómiku nasionál.
Prezidente CAFI hateten katak reuniaun ne’e fó atensaun bo’ot ba kualidade obra no jestaun orsamentu, atu asegura katak projetu hotu-hotu implementa tuir padraun tékniku ne’ebé determina ona no uza rekursu Estadu ho efi-siénsia no transparénsia. “Reuniaun ida-ne’e importante tebes atu asegura katak projetu infraestrutura sira la’os de’it remata tuir planu, maibé mós bele fó benefísiu reál ba povu no kontribui ba dezenvolvimentu sustentável Timor-Leste,.” afirma Prezidente CAFI.
Partisipa iha reuniaun ne’e mak membru CAFI sira, no Diretór-Jerál Desentralizasaun no Governasaun Lokál (DG-DGL), Sr. António Augusto Guterres, reprezenta Ministru Administrasaun Estatál, hamutuk ho reprezentante husi ministériu sira, no reuniaun ne’e ho objetivu, mak atu hametin koordenasaun interministeriál no garante implementasaun efetiva ba projetu infraestrutura estratéjiku sira iha rai-laran.
#Hotu
#Medi@MAE_2026
