Baucau, Sesta-Feira, 13 Marsu 2026 – S.E. Vise-Ministru Administrasaun Estatál, Jacinto Rigoberto de Deus, konvoka reuniaun koordenasaun ho Prezidente Autoridade Munisípiu Baucau, Dra. Veneranda E. M. Lemos Martins, hamutuk ho estrutura servisu munisipál sira no delegasaun territorial sira, atu diskute preparasaun ba Vizita S.E. Primeiru-Ministru ba Munisípiu Baucau iha loron 17 Marsu 2026.
Reuniaun ne’e realiza atu haree besik preparasaun servisu munisipál sira, liu-liu kona-ba avaliasaun kondisaun mínimu hodi hakat ba implementasaun poder lokál, tuir politika desentralizasaun administrativu Governu nian.
Iha reuniaun ne’e, Prezidente Autoridade Munisípiu Baucau relata ba Vise-Ministru MAE katak matéria prezentasaun no preparasaun sira ne’ebé ekipa munisipál prepara ona hetan tiha apresiasaun iha Konsellu Konsultivu Munisípiu, no lori mai iha reuniaun koordenasaun atu hetan orientasaun husi Vise-Ministru kona-ba oinsá atu prepara simu delegasaun Governu Sentral lidera husi S.E. Primeiru-Ministru.
PAM Baucau mos hateten katak Munisípiu Baucau uluk liu tiha ona avaliasaun kondisaun mínimu ba dala rua ho rezultadu “Muito Bom” ho valór 84,56%, ne’ebé hatudu kapasidade no prontidaun estrutura munisipál sira.
Iha oportunidade ne’e, Vise-Ministru MAE subliña importánsia husi preparasaun ne’ebé di’ak no organizadu, tanba vizita Primeiru-Ministru sei sai hanesan oportunidade atu halo avaliasaun ba kondisaun mínimu iha munisípiu sira, hodi haree prontidaun atu implementa poder lokál tuir planu Governu iha futuru.
Vise-Ministru mos enkoraja Autoridade Munisípiu Baucau no entidade relevante sira atu aproveita oportunidade ida ne’e ho preparasaun ida ne’ebé Diak, atu nune’e bele hatudu kapasidade munisípiu iha implementasaun desentralizasaun administrativu no poder lokál.
Hafoin reuniaun remata, Vise-Ministru hamutuk ho delegasaun halo mos observasaun ba fatin balu ne’ebé identifika ona hanesan parte husi ajenda vizita, inklui Rezidénsia PAM, Sede Suku Builai, no sistema bee kanalizasaun ho bomba iha Suku Uatu-Haco, Aldeia Waitalibo, ne’ebé posível sei vizita husi S.E. Primeiru-Ministru Kay Rala Xanana Gusmão durante nia dezlokasaun ba Munisípiu Baucau.
Enkontru ne’e mos marka prezensa husi ekipa tekniku Vise-Ministru MAE, Sekretáriu Munisipál, Diretores Servisu Munisipál sira, Diretores Delegasaun Teritorial sira, Autoridade Seguransa PNTL no F-FDTL, entidade relevante sira, APA sira, inklui Autoridade Komunitária.
Remata
Medi@Mae_2026
