Ataúro, 15 Janeiru 2026 – Sua Esélensia Ministru Administrasaun Estatal, Tomás do Rosário Cabral, hamutuk ho Prezidente Autoridade Administrativa Ataúro (PAAA ), Sr. Mateus Belo, akompaña hosi Xefe Suku Macadade, Sr. Jeremias Alves, Kinta ohin, inaugura projetu Kanalizasaun Be’e Moos no Eskola Ensinu Básiku Primeiru no Segundu Siklu Paralelu, ne’ebé mak finansia husi Programa Dezenvolvimentu Nasionál Suku (PNDS) iha Aldeia Ili-Timur, Suku Macadade, Autoridade Administrativa Ataúro.
Projetu refere, obra husi Programa Nasionál Dezenvolvimentu Suku (PNDS), halo kanalizasaun be’e mos hodi fornese be’e ba komunidade sira inklui Eskola Ensinu Básiku Primeiru no Segundu Siklu Paralelu Ili-Timur. Be’e refere kanaliza husi be’e matan iha Era’ir no transfere mai tanke rezevatoriu ida iha Erane no kontinua mai tanke rezevatoriu ida iha Iletipadu hafoin mai iha Aldeia Ili-Timur.
Eskola Ensinu Básiku Primeiru no Segundu Siklu Paralelu Ili-Timur, kompostu husi sala aula rua (2) no sala ba manorin nain, ne’ebé mak prienxe ona ho fasilidade eskola nian no bele hahu ona halao prosesu aprendizagem ba estudante sira hamutuk 57.
Iha intervensaun S.E. MAE husu ba komunidade sira atu uza be’e ho kuidadu no responsabilidade hodi nune’e uza ba tempu naruk, S.E. MAE hato’o mós agradese ba komunidade sira nia apoiu durante ne’e, hodi ohin lori bele halo inaugurasaun.
S.E. MAE mós husu ba manorin nain sira no Autoridade Ataúro, atu hare ba merenda eskolar, hodi nune’e, iha fulan Janeiru tinan ne’e, merenda eskolar bele lao fila fali.
Iha seremonia refere partisipa hosi Xefi Gabinete MAE, Sr. Benigno H. da Cruz, Diretor Jéral MAE, Diretor Nasionál MAE, Xefe Departamentu, Autoridade Ataúro, Komandante PNTL, F-FDTL, Xefe Suku, Manorin nain no estudante Eskola Ensinu Básiku Paralelu Ili-Timur inklui Komunidade Suku Macadade.
#Remata
Medi@Mae_2026
