Ataúro, 15 Janeiru 2026 – Sua Exelénsia, Ministru Administrasaun Estatál, Tomás do Rosário Cabral hamutuk ho komitiva observa direta progresu manutensaun estrada ligasaun husi Aldeia Arlo ba Aldeia Adara, Suku Beloi ho distansia liu kilometru sanulu resin haat (14km). Estrada sira ne’e sei hasa’e konetividade iha Autoridade Administrativa Ataúro, ne’ebé mak finansia liu husi Fundo Espesial Desenvolvimento Ataúro (FEDA).
Iha vizita ne’e akompaña hosi Prezidente Autoridade Administrativa Ataúro Sr. Mateus Belo, hamutuk ho Diretór Ezekutivu Fundu Espesiál Dezenvolvimentu Ataúro (FEDA), Sr. Hermes da Rosa Correia Barros no Autoridade Lokal sira.
Projetu loke estrada ida ne’e implementa husi kompañia Bandido Qualidade, reprezenta pasu importante ida atu hadi’a infraestrutura illa nian, promove dezenvolvimentu sustentável, no hasa’e konetividade entre komunidade sira iha ilha Ataúro. Projetu estrada ne’e antes 2027 bele halo ona ligasaun iha Ataúro, hodi hakotu izolamentu komunidade sira nian, ne’ebé mak durante tempu naruk nia laran susar atu to’o tanba ho kondisaun estrada ne’ebé ladi’ak.
Estrada ne’ebé loke ona hodi fasilita asesu di’ak liután ba servisu públiku sira, hametin atividade ekonómiku lokál sira, asesu fasil liu ba eskola, sentru saúde no apoia dezenvolvimentu turizmu iha illa ne’e. Ho estrada foun ida ne’e, turista sira sei fasil liu atu esplora ilha Ataúro nia kultura, suku no aldeia sira, tasi-ibun, foho sira, no fatin patrimóniu kulturál sira, ida-ne’e hein atu hamosu rendimentu barak liután ba komunidade lokál sira.
Investimentu ne’e reflete kompromisu husi IX Governu Konstitusionál atu garante dezenvolvimentu ne’ebé ekilibradu iha munisípiu hotu-hotu no Ilha Ataúro.
#Remata
MediaMae_2026
