Kinta-Feira, 9 Abril 2026 – Ministeriu Administrasaun Estatál (MAE) no Embaixada Australia hala’o Reuniaun Grupu Traballu Tékniku (GTT) ba dahuluk iha tinan 2026
Reuniaun ne’e kontinuasaun husi reniaun anterior nian ne’ebé hala’o ona iha dia 5 Novembru tinan kotuk, hafoin hetan aprovasaun ofisiál ba Termu Referensia husi Sua Exelénsia Ministru Administrasaun Estatál iha 14 Outubru 2025.
Objetivu husi Grupu Traballu Téknika mak atu reforsa koordenasaun entre MAE, Embaixada Austrália no PARTISIPA, hodi fasilita komunikasaun no diskusaun kona-ba prioridade prinsipál sira iha planu serbisu. Alein de ne’e mos atu reforsa parseria, hametin transparensia no akontabilidade husi implementasaun ba atividade sira.
Grupu ne’e apoia troka informasaun no diskute asuntu téknika, monitoriza progresu implementasaun planu serbisu anuál, no kontribui ba fortalesimentu kapasidade iha nivel nasionál no munisípiu sira, inklui revizaun relatoriu no diskusaun kona-ba prioridade no koordenasaun serbisu liga ba reforsa prosesu governasaun lokál.
Diskusaun téknika ohin foka mos ba mekanismu atu reforsa sistema no prosesu iha nivel munisipal iha area planeamentu, orsamentu, jestaun finanseira publika, jeneru, inklusaun ema ho difisiente, sistema informasaun dadus nomos prioridade atu reforsa kapasidade munisipal bazeia ba deskobrimentu no rekomendasaun sira husi Avaliasaun Kondisaun Minimu ba Autoridade Munisipais.
Reuniaun ne’e lidera husi DG-SMAL no DG-DGL husi MAE nomós Konselleiru ba Dezenvolvimentu Umanu Interinu husi Embaixada Australia. Partisipa iha enkontru grupu traballu tekniku ne’e mak DG no Diretor Nasionál relevante sira iha MAE, ekipa Embaixada Australia no PARTISIPA nian.
Aleinde ne’e, iha mos atualizasaun kona-ba progresu implementasaun SIBS no SIP, no espasu ba klarifikasaun no troka hanoin entre partisipante sira.
Diskusaun sira mos foka ba alinhamentu prioridade entre MAE no PARTISIPA atu asegura koordenasaun di’ak, inklui asistensia teknika, jestaun finansa públika no kapasidade institucional.
Enkontru taka ho diskusaun kona-ba pasu tuir mai no rezumu husi rezultadu importante sira hodi asegura implementasaun ne’ebé efetivu iha futuru.
MAE kontinua kompromete atu fortalece governasaun lokal no promove dezenvolvimentu sustentável iha Timor-Leste.
#Hotu
#Medi@Mae_2026
