12 Maiu 2026.
Tersa Feira Semana ne’e, Sua Excia Ministru Administrasaun Estatal Tomás do Rosário Cabral, simu ekipa ida husi Buletin Revista LAFAEK husi CARE Internasionál iha sala reuniaun Gabinete MAE.
Iha sesaun husu no hatan, S.E. Ministru MAE, Tomás do Rosário Cabral, informa ba Revista buletin LAFAEK, kona-ba prosesu no objetivu prinsipál implementasaun Politika Desentralizasaun Administrativa no Poder Lokal.
Buletin Revista Lafaek eziste iha CARE Internasionál nia mahon iha Timor Leste hahú husi tinan 2001 no hetan apoiu husi governu Nova Zelandia. Projetu Lafaek servisu hamutuk ho governu Timor leste liu husi Ministeriu Edukasaun ho objetivu atu hadia kualidade aprendizajem, asegura moris diak familia iha aspetu sosial no ekonómika, no hasa’e kapasidade lideransa no promove governasaun inkluzivu no partisipativu foin sae sira nia edukasaun.
Excia Ministru iha entrevista, explika klean kona-ba misaun prinsipál Ministeriu Administrasaun Estatal hanesan hametin governasaun demokrátika no partisipativa, garantia envolvimentu komunidade iha planeamentu no dezenvolvimentu, promove igualdade no inkluzaun sosial.
S.E. Ministru mós foka kona-ba asegura grupu vulneravel nia direitu atu partisipa iha prosesu desizaun públika, enkoraja feto iha aldeia, suku no munisipiu atu envolve iha planeamentu no monitorizasaun ba programa governu nian.
Ministeriu Administrasaun Estatal fó importansia ba hametin justisa sosial, igualdade no evita diskriminasaun iha servisu munisipal sira hotu.
Iha entrevista neé, akompaña husi Diretor Nasionàl Formasaun no Koperasaun MAE, Cesar Martins, Diretor País CARE iha Timor Leste, Peter Goodfellow no diretor Empreza Sosial Lafaek, Marcelino Martins.
#Hotu
#Medi@Mae_ 2026
