S.E. Presidenti Repúblika, Dr. José Ramos Horta, Hamutuk Ho Primeru-Ministru Kay Rala Xanana Gusmão, no Membru Governu sira Ofisializa Loke Feira Ba Públiku Iha Praça Tasi-Tolu, loron Domingo, 17 de Maiu 2026.
Iha okaziaun ne’e, S.E. Presidenti Repúblika, Dr. José Ramos Horta la halo diskursu no Presidenti Repúblika sei hato’o diskursu iha serimónia 20 de Maiu. maibe, iha oportunidade ba loke feira ne’e, Presidenti Repúblika hakarak hato’o deit intervensaun badak ba públiku no povu tomak iha munisípiu katak, ohin ita Komemora festeza 24º Aniversáriu Restaurasaun Independénsia, nudar festa ba povu nian, no festeza ne’e nudar sentimentu kontenti ba povu nia liberdade nudar nasaun soberanu ne’ebé povu hetan iha tinan 24 ba kotuk, ho nune’e Presidenti Repúblika hakarak agradese no parabens ba Komisaun Organizadora, no partisipasaun ema hotu nian iha festa Independensia 20 de Maiu, no Presidenti Repúblika hato’o mos felisitasaun parabens no hako’ak bo’ot ba povu doben Timor-Leste tomak tantu iha rai laran no iha rai liur.
Iha okaziaun hanesan, S.E. Ministru MAE, Tomás do Rosário Cabral nudar Presidenti Komisaun Organizadora, hato’o mos diskursu badak iha okaziaun loke feira nian, presidenti K.O. informa ba públiku katak, diak liu horisehik, ohin ita hamutuk hodi selebra 24º Aniversáriu Restaurasaun Independénsia Nasionál ho tema: “Hamutuk ita konstrui patria ida ne’ebé justu liu, inkluzivu no reziliente”.
Loron 20 Maiu la’ós de’it data ida iha kalendáriu. Ne’e símbolu sakrifísiu, mehi no determinasaun povu Timor nian atu sai livre no soberanu.
Iha selebrasaun tinan ne’e, Governu liu husi Komisaun Organizadora prepara programa oi-oin: serimónia ofisiál, missa, deposisaun flor ba herois, no mós Feira Kulinária Lokál no Konserto Musikal iha Tasi-tolu. Feira ne’e hetan partisipasaun husi grupu kulinária (81) no micro indústria (72). Ida ne’e hatudu katak independénsia mós signifika fó espasu ba povu atu kria no dezenvolve an ekonomicamente.
Ha’u husu ba ita hotu atu kontinua apoia produtu lokál sira, hametin unidade nasionál, no la haluha espíritu patriotismu ne’ebé harii nasaun ne’e, afirma presidenti komisaun organizadora, S.E. Ministru MAE, Tomás do Rosário Cabral.
Iha okaziaun loke feira ne’e hetan mos prezensa husi orgaun soberanu sira hanesan membru Parlamentu Nasionál, membru Governu, aleinde ne’e, partisipasaun maximu husi membru F-FDTL no PNTL hamutuk ho komunidade sira iha Praça Tasi-Tolu.
#Hotu
#Medi@MAE_2026
