Dili, 22 Julho 2026.
Ekipa konjunta lideradu husi SEATOU, kompostu husi DNTT, AMD, Polisia Tránzitu, Obras Públika, no parte relevante seluk, liu husi Komunikadu Imprensa ida ne’e, mai ho servisu bo’ot ida hodi asegura funsionamentu padraun legál sira ne’ebé mak eziste ona durante ne’e, no padraun legal ne’ebé mak sei implementa mak hanesan tuir mai:
1. Decreto-Lei 03/2024, “Higiene no Ordem Públika” 2. Decreto-Lei N.° 33/2025 de 15 de Outubro Primeira Alteração ao Decreto-Lei n.° 3/2017, de 22 de Março, “Regime das Zonas de Estacionamento de Duração Limitada”
3. Lei N.° 1/2025 de 12 de Março, “Medidas de Tutela da Legalidade Urbanística” 4. Decreto-Lei n° 6/2003 de 3 de Abril, “Kódigu de Estrada”
5. Decreto-Lei N.° 9 /2022 de 24 de Fevereiro, “Regime Jurídico da Edificação e Urbanização.”
Husi padraun legal sira ne’e mak loke dalan ba Ekipa Konjunta hodi hala’o servisu, organiza sidade, tau regra no orden públika sira iha sosiedade nia leet, atu nune’e sosiedade sira bele kumpre tuir regra ne’ebé iha.
Ho nune’e, ba implementasaun servisu estraordináriu refere, Ekipa Konjunta sei fo avizu foun no tau sinais estasionamentu iha fatin hotu iha area Sidade Dili, tuir orientasaun Decreto-Lei 33/2025 konaba “Regime das Zonas de Estacionamento de Duração Limitada” hamutuk ho diploma ministerial sira konaba zona estasionamentu iha Sidade Dili nian.
Aleinde ne’e, Ekipa Konjunta mos sei halo servisu estraordináriu refere ho rigorozu, hodi haree ba komunidade sira ne’ebé mak uza espasu públiku la tuir nia dalan mak hanesan tuir mai ne’e:
1. Uza espasu públiku sai hanesan parajen privadu. Bainhira Ekipa Konjunta hala’o operasaun deteta hahalok ida ne’e, Ekipa Konjunta sei foti medidas rigorozu hodi foti karreta sira ne’e tuir prosedimentu kontra ordenasaun liu husi Polisia Tranzitu no DNTT.
2. Uza direitu privadu hodi viola ema seluk nia direitu hanesan toka múzika ho lian maka’as iha tempu kalan hahu husi tuku 21:00 OTL. Kuandu iha keixa ka fiskalizasaun direta husi Ekipa Konjunta, sasan hirak ne’e sei prende hodi tuir prosedimentu kontra ordenasaun.
3. Reafirma ba vendedór ambulante sira hotu atu la bele tan utiliza trotoar no fatin espasu públiku sira hodi hala’o negosiu, hodi prejudika movimentasaun no kria engarrafamentu, espesifiku iha area Kampung Baru, Bairro-Pite, Fatuhada, no fatin seluk tan. Bainhira Ekipa Konjunta hala’o operasaun no deteta infrasaun, sei halo apreensaun ba sasán hotu-hotu.
4. Aleinde ne’e, husu mós ba komunidade sira atu kontrola no asegura sira nia animal labele la’o livre iha sidade laran, no presiza kria kondisaun diak bainhira hakarak hakiak animal. Bainhira Ekipa Konjunta simu keixa ka deteta violasaun durante fiskalizasaun, autoridade sei foti medida rigorozu hanesan halo oho animal iha fatin hodi entrega ba instituisaun karidade.
5. Ikus, husu nafatin ba Emprezariu hotu ne’ebé mak loke loja, restorante, caffetaria, no seluk-seluk tan, presiza kria ka prepara sira nia fatin estasionamentu rasik. Bainhira ida la kumpre, Ekipa Konjunta sei foti medida rigorozu, hanesan husu ba instituisaun kompetente hodi kansela ka hasai tiha sira nia lisensa.
#Hotu
#Medi@MAE_2026
