12 Juñu 2026 – Sexta-Feira, semana ne’e, S.E. Ministru Administrasaun Estatál (MAE),Tomás do Rosário Cabral, akompaña hosi Prezidente Autoridade Munisípiu Ainaro, Sra. Manuela Bucar Corte Real, hamutuk ho Provedór Direitus Umanus no Justisa (PDHJ), Sr. Virgílio da Silva Guterres hamutuk ho represenante Komisaun Anti Korupsaun (CAC), hala’o inaugurasaun bá edifísiu Balkaun Úniku iha Postu Administrativu Ainaro villa, Munisípiu Ainaro.
Prezensa Balkaun Úniku ne’e atu hakbesik prestasaun servisu bá sidadaun sira, moderniza no simplifika servisu atendimentu bá públiku ho lalais no fásil, no bele promove transparénsia hodi governasaun di’ak besik-liu bá povu.
Balkaun Úniku ne’e estabelese bá dala-sanulu resin tolu iha territóriu, liu-liu iha Ainaro neʼebé mai ho ekipamentu foun no lori servisu governamentál sira atu trata Billete Identidade (BI), Pasaporte, no Sertidaun Kriminál hodi hamenus tempu, kustu no todan bá viazen sidadaun sira ne’ebé hela do’ok hosi kapitál.
S.E. Ministru Administrasaun Estatál (MAE), Tomás do Rosário Cabral informa katak Balkaun úniku ne’e estabelese uluk iha munisípiu Manatuto, Baucau, Ataúro, Aileu, Manufahi, Covalima no Oecusse, Bobonaro, Ermera, Laútem no ohin iha Munisipiu Ainaro. Nu-entantu munisipiu Viqueque sei inaugura iha tempu besik. Balkaun Úniku maka sistema ida integradu hodi lori servisu besik liu ba populasaun.
Prosesu pasaporte halo iha Balkaun Úniku ne’e, maibé imprime iha Dili tanba Pasaporte hanesan dokumentu ida ofisiál nia sentrál iha Serve ne’ebé iha Ministériu Justisa. Maibé dokumentu seluk prodús iha Balkaun Úniku.
Servisu ne’e hetan apoiu mós hosi Ministériu Transporte no Komunikasaun (MTK) tanba prosesu sira ne’e tomak presiza internet. Alende ne’e servisu hamutuk mós ho (PNUD) iha Dili, Programa Nasoens Unidas bá Dezenvolvimentu desde tinan 2023.
”Balkaun Uniku ida-ne’e bele fasilita no governasaun besik liu-tán bá Povo. Ida ne’e sai sentru ida governu sentrál nian, informasaun tomak iha ne’e. Balkaun Úniku iha vantajen maka ema atu mai trata dokumentus” S.E. Ministru MAE Tomás do Rosário Cabral hateten.
Prezidente Autoridade Munisípiu Ainaro,
Manuela Georgina Carmo Bucar Corte-Real
agradese bá Governu Da-Sia ne’ebé bele estabelese ona edifísiu Balkaun Úniku ida ne’e hodi bele fasilita sidadaun sira bele mai trata ona dokumentus iha-ne’e.
Balkaun Úniku Munisípiu Ainaro, hetan previlejiu husi Governu entrega mos Transportes hanesan kareta ida no motorizada ida ba kordenador servisu Balkaun Úniku Munisípiu Ainaro husi S.E. Ministru MAE, Tomás do Rosário Cabral, no mos entrega dokumentu importante sira hanesan Billete Identidade, Sertidaun Kriminál ne’ebé produs no emprimi iha BÚ Ainaro hodi entrega ba sidadaun mane no feto nudar representativu hanesan sekuensia ikus nian hodi remata programa lansamentu ofisiál ba edefisiu Balkaun Úniku Munisipiu Ainaro.
Ho inaugurasaun Balkaun Úniku Munisípiu Ainaro nian, Governu komesa kompleta dadauk ona estabelese Balkaun Úniku iha Teritoriu Timor-Leste.
Iha serimónia inaugurasaun BU ne’e partisipa hosi, Membru Deputadu Parlamentu Nasional, Kordenadora Rezidente Nasoins Unidas, Sra. Fumi Balogun, reprezentante husi PNUD, Sr. Bruno Lencastre, Diretores Jerais no Nasionais MAE, Xefe Suku, Autoridade Seguransa PNTL no F-FDTL, Lia-nain inklui komunidade no Estudante sira.
#Hotu
#Medi@MAE_2026
