Baucau, 15 Juñu 2026
Segunda-feira, semana ne’e, S.E. Ministru Administrasaun Estatál, Tomás do Rosário Cabral, hamutuk ho Komisaun organizadora parte governo kompostu husi ekipa MAE, MPIE, MOP halao sorumutu ho parte igreja Diocese Baucau lidera husi, Dom Leandro Maria Alves, Bispu Dioseze Baucau nian, akompanhia husi Padre Paroquia Manatuto, Laleia no Mehara hodi ko’alia kona-ba preparasaun prosesu transladasaun restus mortais preladus Timor-oan na’in-3 husi Portugál mai Timor-Leste, no serimonia omenajem ne’ebé mak sei realiza iha Manatuto, Laleia no Lautem (Mehara), no reuniaun refere ne’e hala’o iha Salaun Dioseze Baucau.
Reuniaun ne’e foka ba diskusaun prinsipál ne’ebé konsentra ba ajenda aprovadu ona husi Komisaun Organizadora konjunta Governu-Igreja nian, ne’ebé estabelese iha fulan hirak liu bá. Pontu ajenda xave sira ne’ebé aborda inklui, Kronolojia iha Portugál ba Transladasaun restus mortais Dom Jaime Garcia Goulart husi Ponta Delgada ba Lisboa, Dom José Joaquim Ribeiro iha Évora, levantamentu restus mortais Mong. Martinho da Costa Lopes iha Semitériu Camaxide, no sei konsentra iha Évora hodi bele realiza missa agradesimentu iha Igreja Katedral no konklui prosesu administrativu ba transladasaun preladu na’in-3 iha Portugal hodi hahu translada mai Timor Leste.
Durante diskusaun parte Komisaun Lokal Governo no Igreja konkorda ho plano atividades neebe iha no prontu asegura preparasaun liu husi koordenasaun, komunikasaun, estebelesimentu Komisaun Organizadora tempu badak nia laran, atu bele hala’o preparasaun ho másimu bazeia ba programa neebe iha, hodi bele la’o ho diak no susesu
Tuir data husi ajenda iha loron 18 Agosto 2026, sei hala’o selebrasaun Litúrjika Misa Asaun Grasas iha Évora ba Dom José Joaquim Ribeiro, Dom Jaime Garcia Goulart no Mons. Martinho da Costa Lopes, ne’ebé sei prezide husi S.E.R. Dom Francisco José Villas-Boas, Arsebispu Évora nian, ho diskursu agradesimentu husi S.E.R. Dom Leandro Maria Alves, nu’udar reprezentante Komisaun Organizadora Igreja nian. Nu-entantu iha misa ne’e sei partisipa mos husi reprezentante Governu Timor-Leste no Igreja hodi hato’o mos agradesementu.
S.E. Ministru MAE destaka katak koordenasaun metin entre Governu no Igreja esensiál atu garante katak prosesu transladasaun no omenajen ba saudozo preladu na’in-3 hala’o ho dignidade, respeitu, no tuir padraun protokolu Estadu no Kreda nian.
Reuniaun ne partisipa mos husi ekipa Komisaun Nasionál no Lokal parte Governu nian kompostu husi DG SMAL, Maria Goretti Marques Belo, Chefi Gabinete MAE, Benigno H.G. da Cruz, Adjunto AND, no Enjeneiru ADN, PAM Lautem, Manatuto no APA Manatuto vila, APA Tutuala, no Laleia
#Hotu
#Medi@MAE_2026
