ERMERA — Sua Exelénsia Vise Ministru Administrasaun Estatál, Jacinto Rigoberto Gomes de Deus, apela ba Autoridade Munisipál Ermera, AME, atu servisu makaas hodi kombate malnutrisaun iha munisípiu ne’e. Apelu ne’e Vise Ministru MAE hato’o iha serimónia Lansamentu Ofisiál ba Programa Bolsa da Mãe Jerasaun Foun – Komponente Saúde Inan no Oan, ne’ebé realiza iha edifísiu Autoridade Munisipál Ermera.
Programa ne’e hanesan inisiativa importante ida husi IX Governu Konstitusionál atu promove saúde no bem-estar inan no oan, liu husi apoiu finanseiru kondisionál ba família sira ne’ebé prenxe kritériu husi Programa Bolsa da Mãe.
Objetivu prinsipál programa ne’e mak:
Garante katak feto isin-rua no labarik sira asesu ba servisu saúde ho kualidade, no Hamenus taxa malnutrisaun; no Hasa’e kualidade moris komunidade.
Iha intervensaun durante serimónia, S.E. Vise Ministru Administrasaun Estatál hatete katak programa ne’e hatudu Governu nia kompromisu forte atu investe iha dezenvolvimentu rekursu umanu, hahú husi família. S.E. Vise MAE mós husu ba Autoridade Munisipál, lideransa komunitária, profisionál saúde no parseiru dezenvolvimentu sira atu hametin koordenasaun no serbisu hamutuk ho Objetivu atu implementa programa ne’e ho prinsípiu transparénsia, efisiénsia no responsabilidade.
S.E. Vise Ministru MAE, Jacinto Rigoberto Gomes de Deus, enfatiza tan katak kolaborasaun entre Governu Sentrál, Autoridade Munisipál, no komunidade importante tebes atu garante benefísiu programa ne’e to’o duni ba inan no oan sira ne’ebé presiza liu.
Serimónia lansamentu ne’e partisipa husi S.E. Prezidente Repúblika, Dr. Jose Ramos Horta, hamutuk ho membru Governu, entidade relevante sira, Autoridade Munisipál Ermera, profisionál saúde, parseiru dezenvolvimentu, lideransa komunitária no benefisiáriu sira
#Hotu
#Medi@MAE_2026
